Rajon & Botë

Egjipti zbulon tempullin e ndërtuar para 2200 vjetësh

Një tempull shumë i vjetër, që besohet se është ndërtuar para 2200 vjetësh, është zbuluar afër lumit Nil në Egjipt.

Tempulli u zbulua nga punëtorët e ndërtimtarisë, të cilët ishin duke e rrëmihur një kanal për ujitje në fshatin Kom Shaku. Lajmin e bëri të ditur Ministria e Antikiteteve.

Puna ndërtimore u ndërpre dhe arkeologët shkuan në vendin e tempullit për t’i analizuar mbetjet e tij.

Ata gjetën mbishkrime ku shkruhej “Ptolemeu i Katërt”. Kjo figurë kishte sunduar në Egjipt nga viti 221 deri në vitin 204 para Krishtit.

Në disa pjesë të tjera të tempullit ishte e gdhendur figura e Hapi-t, i cili nga egjiptianët e lashtë adhurohej si zot i vërshimeve. Në këto figura, ai paraqitet i rrethuar nga zogjtë dhe kafshë të ndryshme.

Egjipti po mundohet që përmes objekteve të lashta ta ringjallë turizmin pas trazirave dhe luftës civile të vitit 2011, shkruan “Independent”, transmeton Gazeta Express.