ShowBiz

Gjykata lëshon urdhër-arrest për Vali Corleonen

Ndonëse ishte ftuar me ftesë të rregullt nga Gjykata në Gjilan, në seancën e sotme nuk është paraqitur as i akuzuari Princ Valentino Corleone as mbrojtësi i tij, Sherif Sherifi.

Për këtë arsye, prokurori Arben Kadriu kërkoi nga kryetari i trupit gjykues, Naser Maliqi, që ndaj të akuzuarit të lëshohet urdhër-arrest për shkak se ai edhe më parë nuk është paraqitur në gjykatë me arsyetimin se gjendet në Itali.

Me aktvendim u aprovua propozimi i prokurorit ngase në rastet kur Corleone nuk është paraqitur në gjykatë nuk ka dëshmuar me prova se vërtetë gjendet jashtë shtetit.

Ndërsa, në seancë ishte prezent i akuzuari tjetër, Gent Qamili, i cili akuzohet se në bashkëveprim me Princ Valentino Corleonen kanë kryer veprat penale “Shkaktim i rrezikut të përgjithshëm” dhe “Mbajta në pronësi, kontroll i paautorizuar i armëve”.

Qamili e Corlone dyshohen se në korrik të vitit 2013, në diskotekën “Stop” në Gjilan, kanë tentuar të shkaktojnë rrezik të madh për jetën e njerëzve, ashtu që pas një marrëveshjeje paraprake, Corleone ia jep një çantë Qamilit, në të cilën gjendej një granatë dore e tipit “A1”.

Me instruksionet e marra paraprakisht nga i akuzuari Corleone, duke i premtuar shpërblim me të holla prej 300 eurove, i akuzuari Genti Qamili merr çantën dhe e vendos në tualetin e diskotekës “Stop” e më pastaj thërret me telefon Policinë e Kosovës dhe e lajmëron se ka bombë në diskotekë dhe largohet.

Sipas aktakuzës, granata e dorës e përdorur nga dy të akuzuarit është gjetur dhe është konfiskuar nga FSK-ja dhe KFOR-i natën e ngjarjes. /kallxo.com/.