Arsim & Kulturë

Këshilli i Prindërve: Greva në arsim, shqetësuese

Këshilli i prindërve të arsimit të Kosovës (KPK) ka reaguar të hënën lidhur me grevën njëditëshe në sistemin e arsimit të thirrur nga SBASHK-u.

KPK thekson se zhvillimet e fundit në procesin edukativo arsimor në Kosovë dhe mos harmonizimi i qëndrimeve në mes të Qeverisë së Kosovës dhe SBASHK-u është tepër shqetësuese për prindërit, nxënësit dhe qytetarët e Kosovës dhe i dëmshëm për sistemin arsimor në Kosovë.

“Me gjithë arritjen e marrëveshjes në mes të Qeverisë së Kosovës dhe Sindikatës së Arsimit të Kosovës, vitin e kaluar, nuk ka filluar implementimi i saj e që është bërë edhe shkas për grevat e përgjithshme të mësimdhënësve…”, thuhet në reagim.

KPK thekson se mos gatishmëria dhe jo serioziteti i organizmave shtetëror, për të përmbushur obligimet ndaj mësimdhënësve është tepër shqetësuese dhe zhgënjyese, andaj sipas tyre është momenti kritik që MASHT-i dhe Qeveria e Kosovës të reflektoj pozitivisht në zgjidhjen e këtij problemi.

“Kërkesat e vazhdueshme për grevë janë një kërcenim për nxënësit dhe prindërit dhe se çdo paralajmërim për grevë po ndikon drejtpërsëdrejti në aspektin psikologjik tek nxënësit dhe po zbehet i ter procesi mësimor edhe ashtu tepër i brishtë në Kosovë. Këshilli i Prindërve të Kosovës kupton brengën dhe hallet e mësimdhënësve dhe plotësisht pajtohet me kërkesat e tyre të drejta për njohjen e stazhit të punës të viteve të nëntëdhjeta, por njëkohësisht vlerësojmë se nuk është greva opsioni i vetëm i duhur për realizimin e kërkesave të mësimdhënësve”, thuhet më tej.

“Këshilli i Prindërve dhe prindërit në përgjithësi kërkojnë njëkohësisht edhe nga Qeveria e Kosovës edhe nga SBASHK-u që të jenë tepër të matur dhe të kujdesshëm dhe mos të ndërmarrin veprime që e cenojnë mbarëvajtjen e procesit mësimor”. /Telegrafi/