Rajon & Botë

Le Pen nën akuzë për shpërdorim besimi

Marine Le Pen, presidentja e Frontit Kombëtar (FN), partia e ekstremit të djathtë francez, u akuzua sot për shpërdorim të besimit në hetimin për asistentët parlamentarë të eurodeputetes së FN.

”E thirrur gjatë pasdites nga gjyqtarë të sektorit financiar në Gjykatën e Parisit përgjegjëse për këtë çështje hetimore, Marine Le Pen e moshës 48 vjeçare lëshoi një deklaratë dhe nuk iu përgjigj pyetjeve siç e detyron ligji”, njoftoi për median avokati i saj, Rodolphe Bosselut, raporton AFP.

Bosselut shtoi se klientja e tij kishte depozituar një ankesë prej së hënës kundër kësaj aktakuze, që në këndvështrimin e saj shkel parimin e ndarjes së pushteteve.

”Kandidatja humbëse në presidencialet franceze, e zgjedhur eurodeputete në 2004, është nën akuzë për ‘shpërdorim besimi’, në cilësinë e deputetes evropiane nga viti 2009 deri në 2016 për përdorim të fondeve evropiane në rrogat e derdhura për llogari të shefes së kabinetit të FN-së, Catherine Griset dhe truprojës së saj Thierry Legier”, bëri të ditur një burim gjyqësor.