Në zonat malore , duhen përdorur zinxhirët; si rrallë herë dhe në Tiranë

Ministria e Transporteve në një njoftim për shtyp sqaroi te enjten në mëngjes situatën ne akset rrugore në vend.

Siç mësohet, në të gjitha akset kalueshmëria është normale, ndërsa vetëm në pak akse kalimi duhet bërë me zinxhire. Këto akse janë në zonat kryesisht  malore, por si rrallë edhe në Tiranë.

Sipas njoftimit, në rajonin verior te Shkodrës, kalueshmëria e akseve po shkon drejt përmirësimit. Kontraktorët janë dukë bërë pastrimin dhe hedhjen e kripës në zonat ku ka ngrica.

Në rajonin qendror te Tiranës, sot në shumicën e akseve qarkullimi kryhet me zinxhirë. Apelohet qe të bëhet kujdes në qarkullim sepse ka formim të akullit në rrugë. Kontraktorët janë duke punuar për pastrimin e rrugës dhe hedhjen e kripës në shumë zona si, Mbikalimi i Kasharit, Superstrada Tiranë – Durrës etj.

Në rajonin jugor Gjirokastër, në qarkun e Korçës ka patur temperatura të ulëta deri minus 10 gradë. Përveç aksit të Dardhës, Voskopojës dhe Ersekë – Gërmenj, të gjitha akset e tjera qarkullohen pa zinxhirë.

Në qarkun e Vlorës, autostrada Vlorë – Levan dhe rruga e vjetër qarkullohen me zinxhirë.  Po kështu qarkullohen me zinxhirë disa akse në Fier, Berat etj.

Në të gjitha akset po punohet për hedhjen e kripës dhe pastrimin dhe nuk ka asnjë bllokim te akseve kombëtare.