Aktuale

Të dorëhequrit nga PDK-ja themelojnë Iniciativë qytetare

Të larguarit nga Dega e PDK-së në Fushë-Kosovë kanë iniciuar themelimin e një Iniciative qytetare në këtë komunë.Nëpërmjet një deklarate për media, këtë iniciativë e kanë marrë kryetari e deritashëm i Degës së PDK-së, nënkryetarët dhe shumica dërrmuese e anëtarëve të Kryesisë dhe të Këshillit Drejtues.

“Takimi i sotëm përmbylli fazën transitore të përcaktimit prej dorëheqjeve masovike drejt konsolidimit të një formati të ri të angazhimit. Këtë ide dhe koncept të ri të prezantuar nga z.Grajcevci, z.Kolshi dhe z.Shala e mbështetën fuqishëm kryetarët dhe anëtarët e kryesive të shumicës së nëndegëve të PDK-së; nënkryetarja dhe përfaqësuese të Kryesisë dhe të strukturave të gruas Demokratike; kryetari, nënkryetarët dhe përfaqësues të kryesisë aktive të Rinisë Demokratike; si dhe nga përfaqësues të ndryshëm nga subjektet e tjera politike dhe qytetarë të ndryshëm të papërcaktuar politikisht”, thuhet në deklaratën për media.

Sipas tyre, kjo Iniciativë do të ketë dy ulëse në Kuvendin Komunal të Fushë-Kosovës, e që, siç thuhet aty, pritet të jetë forca e dytë, sipas ofertave përkrahëse që janë duke u bërë nga asamblistë të ndryshëm.

the authorE B