Sport

Cana në mesin e legjendave të Marseille

Lorik Cana është një prej futbollistëve më të dashur në skuadrën e Marseille.

Cana në Marsejë është një legjendë. Ish-kapiteni i kombëtares së Shqipërisë këtë fundjavë u rikthye sërish në ‘Velodrome’ dhe tifozët treguan se për ta mbetet i paharruar.

Loriku këtë të diel ishte i ftuar nga klubi bashkë me emra të të tjerë të njohur si Papen, Boli, Angloma apo Bogosian për të marrë pjesë në takimin mes legjendave të kësaj skuadre, që ka kërkuar ndihmën e tyre për t’u rikthyer në majat më të larta të futbollit francez dhe atij ndërkombëtar, ashtu siç ishte në periudhën kur Loriku mbante në krah shiritin e kapitenit.

Bashkë me legjendat e tjera të ekipit Cana ndoqi në stadiumin ndeshjen e kësaj të diele mes Marseille dhe Lille, me ekipin vendas që ju përgjigj thirrjes së legjendave duke fituar pastër 2:0 me gola të Gomis dhe Thauvin.