Rajon & Botë

Ende nuk dihet shkaku i vdekjes së Kim Jong-nam

Shkaku i vdekjes së Kim Jong-nam, gjysmë-vëllait të liderit të Koresë së Veriut, Kim Jong-un, i cili vdiq më 13 shkurt, pas dyshimeve se ishte helmuar në aeroportin e Kuala Lumpur-it, ende nuk është vërtetuar, thanë zyrtarët, transmeton Anadolu Agency (AA).

Autopsia ka treguar se Jong-nam nuk ka vdekur nga ataku në zemër, por nuk ka as shenjë të shpimit nga gjilpëra, theksoi Noor Hisham Abdullah, një përfaqësues i Ministrisë së Shëndetësisë të Malajzisë.

I pyetur nëse ka shenja se ishte i helmuar, Noor Hisham tha se mostrat mjekësore i janë dërguar ekspertëve të cilët mund të përcaktojë shkakun e vdekjes.

“Duhet të vërtetojmë në laborator para se të sjellim ndonjë përfundim”, tha Noor Hisham dhe shtoi se asnjë nga anëtarët e familjes së tij ende nuk e kanë kërkuar trupin.

Kim Jong-nam është djali i madh i ish-udhëheqësit të Koresë së Veriut, Kim Jong-il. Në Korenë e Veriut nuk ka asnjë titull për shkak se ka lindur nga marrëdhënia jashtëmartesore e ish-liderit dhe aktores së Koresë së Jugut Sung Hae-rim. Në 15 vitet e fundit ai ka jetuar në Kinë dhe Azinë Juglindore.

Policia e Malajzisë ka njoftuar se deri më tani janë arrestuar katër persona në lidhje me vdekjen e tij, dhe këta janë shtetas të Koresë së Veriut, Malajzisë, Indonezisë dhe Vietnamit.

Mediat të hënën publikuan momentin në të cilin dy gra në aeroportin e Kuala Lumpurit i afrohen Kim Jong-nam-it. Në video shihet se si gruaja me fanellë të bardhë i afrohet dhe i vendos diçka në fytyrën e tij, pastaj me qetësi shkon dhe kalon me të dyshuarën e dytë.

Ai pas kësaj kërkoi ndihmë mjekësore, ndërsa mjekët thonë se para se të vdiste u ka thënë se është sulmuar më spërkatës kimik. Jong-nam vdiq në ambulancë rrugës për në spital.