Ekonomi

G20: Të përgatitur për Brexit

Dalja e Britanisë së Madhe nga Bashkimi Evropian (Brexit) nuk do të jetë e pakapërcyeshme, deklaruan sot ministrat e Financave dhe shefat e bankave qendrore të vendeve të G2-ës.

“Anëtarët e G20-ës janë të pozicionuar për t’u përballur në mënyrë aktive me pasojat e mundshme ekonomike dhe financiare që rrodhën nga referendumi britanik, që vendosi largimin e vendit nga Bashkimi Evropian”, thuhet në komunikatën zyrtare të vendeve të G2-ës, pas samitit dyditor në Chengdu, 1 800 kilometra në jugperëndim të Pekinit.

”Rigjallërimi i ekonomisë globale vazhdon, edhe pse mbetet më i ngadalshëm nga sa kërkohet. Megjithatë, përfitimet nga rritja ekonomike kanë nevojë të shpërndahen më mirë brenda dhe ndërmjet vendeve për të nxitur përfshirjen”, theksohet në komunikatë.

Dje, G20-ta tha se politikat globale të taksave duhej të përmirësoheshin për të reflektuar globalizimin dhe për të nxitur një rritje ekonomike të qëndrueshme dhe të balancuar nga pikëpamja sociale.

the authorSamir Dalipi