Aktuale

Haradinaj: Kosovës i duhet një shtet ligjor dhe pa korrupsion

I nominuari për kryeministër nga koalicioni PDK-AAK-Nisma, Ramush Haradinaj të premten gjatë një tubimi zgjedhor në Shtime, tha se Kosovës i duhet një shtet pa korrupsion dhe shtet ligjor.

Ai ka thënë se Shtime ka dhënë shumë në luftë, por pas luftës po mungojnë investimet. Për më tepër, kreu i AAK-së tha se qeveria e ardhshme nuk do ta lë vetëm asnjë qytetar, ndërkohë që do të ketë zgjidhje edhe për sektorin e shëndetësisë.

Haradinaj pohoi se nëse janë dhënë njerëzit më të mirë liri, nëse janë kaluar gjithë ato sfida dhe vështirësi që me qenë shtet, atëherë përse nuk po bëhet shteti.

Ai tha se nëse ka mundësi për t’i luftuar të gjitha ato sfida pse nuk mundet vendi të luftojë korrupsionin dhe të bëjë një shtet siç i ka hije.

“Shtylla bazë e programit tonë është shteti ligjor, juridiksioni gjyqësori, e drejta, barazia për të gjithë, se të gjithë jemi njerëz të këtij vendi. Lista e koalicionit tonë fitues është me numër 12. Nuk do ta lëmë qytetarin vetëm, nuk do të sillemi sikurse jemi larg. Nëse qytetari ynë dëshiron që të punojë, është një ndërmarrës i vogël, apo ndonjë fermer do ta ketë edhe një krah e ka qeverinë, nuk është vetëm. Të gjithë që kemi hyrë në koalicion jemi të vetëdijshëm se punët nuk kanë shkuar mirë deri tani dhe duhet, ja sot, ja kurrë, mos me e lënë veten kështu. E përmenda më herët, rrugën, lavdin, vuajtjen, sepse desha t’ju themi që edhe ju e keni hisen tuaj, hisja juaj është edhe kur punohet edhe kur arrihet suksesi. Projekti ynë është serioz, marrja e përgjegjësive është bërë nga unë duke dikur që vendin nuk duhet ta lëmë në gjendjen që është”, tha Haradinaj.

Kreu i AAK-së u bëri thirrje qytetarëve që ta votojnë listën me kandidatë të koalicionit PDK-AAK-Nisma, pasi ka një program të mirëfilltë për qytetarët e Kosovës.

Ndërsa, kandidati për deputet nga radhët e AAK-së, Xhavit Zariqi theksoi se me qeverisjen Haradinaj do të bëhet një shtet për të gjithë qytetarët. Sipas tij, programi i Haradinajt do të fillojë nga dita e parë e punës të implementohet dhe do të ketë ndryshime në arsim, shëndetësi, kulturë dhe në të gjitha aspektet tjera.

Zariqi: Kosovës i duhet një shteti të mirëfilltë ekonomik (Video) “Ndryshim ky, i cili kaherë është kërkuar nga qytetarët e Republikës së Kosovës, por që tani i erdhi mundësia që Haradinaj është i nominuar për kryeministër nga koalicioni fitues. Ky koalicion të udhëheqë dhe të fillojë ndryshimi sa më shpejt, ndryshim i shumëpritur ku do të fillohet në radhë të parë për sigurimin e qytetarëve, krijimin e shtetit ligjor, krijimin e një shteti të mirëfilltë ekonomik ku do të punohet dhe do të ketë punë për të gjithë të interesuarit për punë e sidomos për rininë e Republikës së Kosovës, e cila deri më tani në çdo kohë dhe në çdo moment ka menduar si të ikë nga Kosova”, tha Zariqi.

Ndërsa, kryetarja e Forumit të Gruas të AAK-së, Magbule Shkodra, tha se vota e qytetarëve më 11 qershor do t’i japë fund të gjitha padrejtësive që i patën kosovarët deri më tani. /kp