Aktuale

Kosova dhe Suedia përballë COVID-19, cila ka masat më të forta dhe pse

Ndërkohë që shtetet anëtare të Bashkimit Evropian miratojnë masa të ashpra të karantinës për të luftuar pandeminë me koronavirus, duke përfshirë edhe mbylljen e kufijve kombëtarë, mbylljen e shumë bizneseve dhe prezantimin e masave strikte për distancim shoqëror, është një vend në BE që është duke vepruar ndryshe deri më tani, Suedia.

Në Suedi, fëmijët deri në moshën 16-vjeçare ende shkojnë në shkollë. Dyqanet, restorantet dhe kafiteritë janë të hapura, ndonëse një masë e fundit e prezantuar lidhur me koronavirusin u ndalon konsumatorëve bërjen e porosisë në banak – vetëm shërbimi në tavolinë është i lejuar, shkrun FaktePlus.

Por pse Kosova ka masat më të shtrënguara se Suedia. Kjo është sqaruar nga zëdhënësi i Ministrisë së Shëndetësisë së Kosovës, Faik Hoti.

Ai me anë të një shkrimi në facebook ka sqaruar pse Kosova ka masa më të forta se shteti Suedez.

Hoti thekson se Suedia ka një sistem më të avancuar shëndetësoj se ai i Kosovës. Ai po ashtu thotë se në Suedi në 1 km katror jetojnë vetëm 23 banorë, ndërsa në Kosovë 159 banorë.

Shkrimi i plotë i Hotit në facebook:

Suedia dhe Kosova

Covid-19/ Një (pa) krahasim të dhënash

Sistemi shëndetësor i Suedisë është në mesin e sistemeve shëndetësore më të zhvilluara në botë.

Suedia renditet në mesin e pesë vendeve të para në botë për sa i përket vdekshmërisë së ulët të foshnjave.

Është një nga shtetet me mirëqenien më të lartë në botë, me investime të larta në këtë fushë dhe me një sistem arsimor në nivel gati të së përkryeres.

Deri tash ka aplikuar një qasje të lirë sa i përket menaxhimit të pandemisë Covid-19, duke mos vënë kufizime në lëvizjen e njerëzve sikur shumica e shteteve të tjera.

I ka 10.333 456 banorë. Deri tash i ka 1580 të vdekur, 40 veç sot. Apo, 153 të vdekur në 1 milionë banorë.

Kosova, në anën tjetër, ka një sistem shëndetësor që me asgjë nuk mund të krahasohet me atë të Suedisë, ka shkallën më të lartë të vdekshmërisë perinatale të foshnjave në Evropë, një nënfinancim të skajshëm, derisa në situatë të ngjashme janë edhe sistem social dhe ai arsimor.

Në Suedi në 1 km katror jetojnë vetëm 23 banorë, në Kosovë 159.

Nuk është e njëjtë që në kushtet e një “bashkëjetese” me një virus që në një hapësire të njëjtë të jetojnë si 23 si 159 veta.

Kosova, tash për tash, qëndron më mirë se Suedia sa i përket Covid 19 vetëm sa i përket numrit të vdekurve në 1 milionë banorë (6.6 të vdekur në 1 milion banorë në Kosovë) që mund të lidhet deri diku me popullsinë shumë më të re se që e ka Suedia.

Bazuar në këto të dhëna, kemi të bëjmë me dy shtete që nuk ngjasojnë me asgjë, përveç me dy ngjyra të përbashkëta të flamurit.