Rajon & Botë

Kroacia goditet nga një varg tërmetesh të mërkurën, paralajmërohen dridhje më të forta

Kroacia është goditur përsëri nga një tërmet mjaft i fuqishëm të mërkurën në mëngjes. Dridhja u regjistrua rreth orës 6 e 15 minuta në mëngjes dhe kishte fuqi prej 4.9 shkallësh të Rihterit.

Epiqendra e tërmetit ishte 16 kilometra në veriperëndim të Sisakut, në thellësi prej tetë kilometrash nën sipërfaqen e tokës, shkruan Dnevnik, transmeton Gazeta Express.

Pas dy tërmeteve të mërkurën në mëngjes, zjarrfikësit lokalë në Sisak dhe Petrinja morën raporte për shembje të oxhaqeve. Komandanti i zjarrfikësve, Slavko Tucakoviq, tha se fatmirësisht nuk është raportuar për viktima të reja.

Ai shtoi se mbi 700 zjarrfikës kanë shkuar në zonën e goditur nga tërmeti të martën për t’u dalë në ndihmë qytetarëve. Zjarrfikësit kanë marrë me vete edhe 11 qen për kërkim-shpëtim.

Ines Ivançiq, kryetare e Shërbimit Sizmik, tha se toka do të vazhdojë të lëkundet. “Do të lëkundet për një kohë të gjatë. Tërmeti i së martës ishte shkatërrues dhe do të pasohet me siguri të lartë nga një varg i madh i tërmeteve, mes të cilëve, sigurisht, do të ketë tërmete më të fuqishme”, tha ajo.

Kjo zyrtare shtoi se dridhjet më të dobëta, si ajo e mëngjesit të së mërkurës, do të kenë ndikim në ndërtesat në Petrinja dhe Sisak që janë dëmtuar nga tërmeti i së martës.