Arsim & Kulturë

Në Kolegjin AAB po mbahet konferenca studentore “Prishtina Regional Conference”

Me një ceremoni solemne në të cilën morën pjesë qindra studentë nga vende të ndryshme të botës, në Kolegjin AAB nisi punimet konferenca regjionale e Prishtinës e organizuar nga European Students for Liberty.

Në këtë konferencë ku po trajtohen tema si: sipërmarrja në të drejtat dhe liritë individuale, tregu i lirë, liria e shprehjes, e shumë fusha të tjera me rëndësi për studentët, njëri ndër folësit ishte edhe zëvendësrektori i AAB-së prof.dr. Shemsedin Vehapi i cila para pjesëmarrësve prezantoi punën e Kolegjit AAB ndër vite, duke potencuar se që nga themelimi AAB po kontribuon në ngritjen e nivelit të hulumtimeve shkencore.

“Pjesë e rëndësishme e misionit të Kolegjit AAB është t’ i ndihmojmë shoqërisë sonë të integrohet në proceset evropiane, dhe kjo konferencë sot është një mënyrë perfekte e realizimit të këtij misoni. AAB gjithashtu i kontribuon aktivisht jetës shoqërore të vendit dhe realizon programe cilësore të bashkëpunimit ndërkombëtar në arsim të lartë e në kërkime shkencore”, tha Vehapi.

Para studentëve pjesëmarrës me ligjëratën e tij për lirinë e shprehjes ishte edhe gazetari i pavarur nga Luksenburgu, Bill Ëirtz, i cili mes tjerash tha se një shoqëri demokratike nuk mund të ekzistojë pa lirinë e plotë të shprehjes.

Ai gjithashtu tha se mediat të cilat veprojnë pa ndërhyrje nga jashtë janë pikënisje për t’ u siguruar që qytetarët kanë qasje në informacion dhe janë në gjendje të flasin atë që e mendojnë në lidhje me tema të ndryshme.

Ndërsa për studentët konferenca “Prishtina Regional Conference” ishte e mirëseardhur. Ata gjithashtu shprehën gatishmëri për të mbështetur aktivitete të tilla edhe në vazhdimësi.

“Students for Liberty” është rrjeti më i madh i studentëve proliberalë në botë, ndërsa si organizatë funksionon edhe në Kosovë. Mision i saj është të edukojë, zhvillojë dhe fuqizojë gjeneratën e ardhshme të liderëve të lirisë.

the authorBurbuqe Metolli