Sport

Stadiumi Nacional i Futbollit do të ndërtohet në Bërnicë të Poshtme

Këshilli Kombëtar i Investimeve, sot mbajti takimin e radhës, në të cilin u miratua projekti “Ndërtimi i Stadiumit Nacional të Futbollit në Prishtinë”. MKRS-ja njofton se ka përcaktuar lokacionint, i cili është në Bërnicë të Poshtme, që ndodhet 4.5 km nga qendra e Prishtinës, në një hapësirë prej rreth 38 hektarësh.

Ky hap është tejet i rëndësishëm, meqë me të fillojnë aktivitetet ligjore për konkretizimin e financimit të projektit, vlerësoi me këtë rast, Kujtim Shala, ministër i Kulturës, Rinisë dhe Sportit.

Ministri Shala para anëtarëve të Këshillit, u shpreh se ky projekt është pjesë e Programit të Qeverisë së Republikës së Kosovës, si dhe një nga synimet themelore të MKRS-së.

Po ashtu, ministri Shala u shpreh Qeveria e Kosovës, në vitin 2014, me një vendim të veçantë, ka vendosur që të ndërtojë Stadiumin Nacional dhe në vendim ka përcaktuar si vend për ndërtimin e tij Prishtinën.

Më tej, Shala bëri të ditur se mbi bazën e atij vendimi, MKRS-ja ka identifikuar dhe zhvilluar procedurat për përcaktimin e lokacionit, saktësisht në Bërnicë të Poshtme, lokacion që ndodhet 4.5 km nga qendra e Prishtinës, në një hapësirë prej rreth 38 hektarësh, në të cilën, përpos Stadiumit Nacional, do të ndërtohen edhe objekte të tjera sportive të karakterit nacional.

Shala shtoi se pas anëtarësimit të Federatës së Futbollit të Kosovës në UEFA dhe në FIFA, Kosova duhet të plotësojë standardet që kanë përcaktuar këto dy organizata, më të rëndësishmet e botës së futbollit, përfshirë infrastrukturën.

“Financimi i projektit të Stadiumit Nacional të Futbollit, për shkak të natyrës së projektit, duhet të trajtohet në mënyrë të veçantë dhe të negociohet përmes një marrëveshjeje financiare të veçantë. Kostoja totale e projektit pritet të definohet, mirëpo, bazuar në modele të ngjashme te stadiumeve, parashihet të jetë 40-50 milionë euro”, thuhet në një komunikatë të MKRS-së.

Në fund, Shala u shpreh se ndërtimi i Stadiumit Nacional do të përmirësonte dukshëm gjendjen e përgjithshme të infrastrukturës së sportit e në veçanti të futbollit. Ndërsa, ndërtimi i Qendrës Nacionale të Sporteve do të ndihmojë për plotësimin e kritereve ndërkombëtare dhe do të mundësojë zhvillimin e aktiviteteve sportive ndërkombëtare në vendin tonë, dhe një tjetër ndihmesë do të jetë edhe punësimi në Qendrën Nacionale të Sporteve, e cila do të menaxhohet nëpërmjet kushteve të ofruara me ligj nga Qeveria e Kosovës./KosovaPress/