Aktuale

Thaçi pas vendimit të Kushtetueses: Kam qenë i bindur se çdo hap që kam ndërmarr ishte në përputhje me Kushtetutën e Kosovës

Pas vendimit të Gjykatës Kushtetuese rreth dekretit të Presidentit të Kosovës, Hashim Thaci për mandatimin e Avdullah Hotit për kryeminister, ka reaguar i pari i shtetit.

Ai ka thënë se edhe Gjykata Kushtetuese e konfirmoi se vendimet e tij kanë qenë në përputhje me Kushtetuën.

Thaci kërkoi pjekuri politike nga të gjitha partitë politike në vend

Postimi i plotë i Thaçit:

E mirëpres vendimin e Gjykatës Kushtetuese lidhur me vlerësimin e kushtetutshmërisë së dekretit tim për mandatimin e z. Hoti, kandidat për kryeministër. Kam qenë i bindur se çdo hap që kam ndërmarr ishte në përputhje të plotë me Kushtetutën e Kosovës dhe më vjen mirë që këtë e konfirmoi edhe Gjykata Kushtetuese.

Partitë politike dhe të gjitha institucionet duhet të tregojnë pjekuri politike, respekt dhe përkushtim për rendin, ligjin dhe institucionet e Republikës së Kosovës. Ato duhet t’i respektojnë, pranojnë dhe zbatojnë vendimet e autoritetit përfundimtar për interpretimin e Kushtetutës dhe përputhshmërisë së ligjeve e akteve të tjera me Kushtetutën.

Kosovën e presin shumë sfida përpara, prandaj tash nuk duhet të humbet më kohë për formimin e Qeverisë së re, me legjitimitet të plotë nga Kuvendi i Kosovës.