Qëllimi dhe profili i programit

Programi Master në Kontabilitet dhe Auditim synon që të ndërtojë tek studentët njohuri të avancuara teorike dhe profesionale në fushën e kontabilitetit dhe auditimit, të cilët fitojnë shkathtësi të hulumtimit të pavarur shkencor, të cilët janë konkurrent në tregun vendor, regjional dhe ndërkombëtarë të punës, dhe të cilët i kontribuojnë korporatave dhe komunitetit të biznesit përmes hartimit të strategjive për zgjidhjen e problemeve dhe vendimmarrjen e duhur. 

Qëllimi i programit të studimit Kontabilitet dhe Auditim është ofrimi i një programi cilësor pas niversitar i cili është në përputhje me standardet më të larta akademike dhe shkencore, dhe i cili përgatit studentët për avancim në tregun e punës të cilët janë të aftë të punojnë sipas standardeve ndërkombëtare të kontabilitetit, raportimit financiar dhe auditimit. Përgjithësisht programi është hartuar në atë mënyrë që përmban disa lëndë kryesore -bazike që janë të profesionit, lëndë të përgjithshme që përfshijnë fushat që lidhen ngushtë me profesionin e Kontabilitetit dhe Auditimit, pastaj disa lëndë zgjedhore, të cilat i ndihmojnë studentit që të zgjedh lëndë sipas interesimit të tij për fushën e Kontabilitetit dhe Auditimit. Shpërndarja e lëndëve totale të kërkuara për programin e studimeve është 50% lëndë të profesionit, 25 %

lëndë të cilat janë të lidhura ngushtë me profilin e Kontabilitetit dhe Auditimit dhe 25% lëndë zgjedhore.

Hartimit të këtij programi të studimit i ka paraprirë një proces gjithëpërfshirës: Udhëzimi i ri administrativ 01/2020 për raportimet financiare të ndërmarrjeve, miratuar nga Ministria e Financave dhe Transfereve, Këshilli Kosovës për Raportim Financiar, është rritur kërkesa për Kontabilist dhe Auditor në Kompanitë e Kosovës dhe ne si Kolegj duke patur parasysh kërkesën e madhe në treg kemi vendosur që të ofrojmë programin e ri të masterit për Kontabilitet dhe Auditim. Arsyeja e rritjes së kërkesës është se të gjitha ndërmarrjet duhet që Pasqyrat Financiare ti certifikojnë nga Kontabilistët e certifikuar dhe të kryejnë procesin e auditimit. Opinioni i marrur nga Odat Ekonomike të Kosovës është se përpos nivelit profesional që duhet të kenë Kontabilistët dhe Auditorët atyre ju nevoitet edhe niveli akademik, andaj ne bazuar në opinionin dhe anketave të zhvilluara me korporatat e Kosovës kemi ardhur në konkludim se duhet të ofrojmë edhe një program të ri në Master në Kontabilitet dhe Auditim.

Rezultatet e të nxënësit

Në nivel të përgjithshëm, në fund të studimeve master studentët e Fakultetit Ekonomik pajisen me këto aftësi:

• të zbatoj praktikat më të mira, në nivel të avancuar të kontabilitetit dhe auditimit në korporata;
• të analizojë në nivel strategjik, të zgjedhë probleme dhe të marrë vendime në rrethinën shumë komplekse dhe të ndryshueshme të biznesit; 
• të aplikojë njohuritë e tij në praktikë dhe komunikojë ato audienca të specializuara në mënyrë të qartë dhe të bindshme; 
• të përgatisë dhe prezantojë teza, raporte dhe seminare, projekte sipas standardeve profesionale;
• të udhëheqë projekte investive;
• të organizojë dhe zbatojë një projekt hulumtues; 
• të menaxhojë kohën në mënyrë efikase dhe të pavarur. 

Pas përfundimit të suksesshëm të programit MSc Kontabilitet dhe Auditim, studentët do të jenë në gjendje të:

• Definojnë, përshkruajnë dhe të demonstrojnë njohuritë e avancuara, në nivelin shkencor dhe praktik të teorisë së kontabilitetit dhe auditimit në bazë të metodologjisë kërkimore shkencore;

• Njohin metodat e llogaritjes së kostos, teknikave për vendimmarrje afatshkurtër dhe afatgjatë, metodave të ndryshme të vlerësimit të inventarit dhe aspekteve të tjera të vendimmarrjes afariste;
• Njohin procesin e auditimit, përgjegjësinë profesionale të auditorëve dhe përmbajtjen e domethënien e raporteve të auditorëve të brendshëm dhe të jashtëm;
• Prezantojnë dhe zbatojnë plane strategjike për maksimizimin e profitit të korporatave;
• Krijojnë pasqyrat financiare, pasqyrat financiare të konsoliduara, në bazë të standardeve ndërkombëtare të raportimit financiar dhe të analizojnë ato pasqyra sipas metodologjisë më të avancuar; 
• Analizojnë informacione financiare, llogaritin treguesit e performancës dhe interpretojnë aspektet e ndryshme të operacioneve bazuar në raportet në dispozicion;
• Të punojnë në mënyrë të pavarur, të planifikojnë dhe të organizojnë qëllimet në zbatimin e standardeve ndërkombëtare të kontabilitetit dhe auditimit;
• Zbatojnë njohuri të avancuara, në lidhje me çështjet profesionale të etikës së kontabilitetit dhe auditimit.
• Të jenë në gjendje që të marrin vendime strategjike dhe zgjidhjen e problemeve për korporatat;
• Të aplikojnë, monitorojnë dhe kontrollojnë legjislacionin tatimor sipas kërkesave të autoriteteve shtetërore për nevojat e korporatave;
• Të demonstrojnë aftësinë për të komunikuar me menaxhmentin, klientin e firmës së auditimit, punonjësit, kreditorët, përfaqësuesit e institucioneve dhe agjencive shtetërore;
• Të punojnë në mënyrë efikase si një anëtar i ekipit, duke treguar sjellje kompetente dhe profesionale e modeste, mendim kritik, dhe duke kuptuar e respektuar ndryshimet kulturore;
• Të demonstrojnë aftësinë për të komunikuar dhe transferuar çështjet e kontabilitetit tek personat me profile të ndryshme arsimore, përvojë dhe stile të komunikimit;
• Njohin nevojën dhe aftësinë për t‟u ballafaquar me zhvillim të vazhdueshëm profesional dhe me të mësuarit gjatë tërë jetës.

Niveli dhe grada akademike

Programi i Studimit MSc Kontabilitet dhe Auditim është program i nivelit Master (MA), përkatësisht i nivelit VII të Kornizës Kombëtare të Kualifikimeve (KKK-së). 

Kohëzgjatja dhe vëllimi

Studimet në Programin MSc Kontabilitet dhe Auditim zgjasin 2 vite, 120 ECTS me gjithsejtë 4 semestra. 

Secili semestër duhet të plotësojë kuotën e 30 ECTS.