Misioni i programit LLM Juridik i Penal është që të pajisë të diplomuarit me njohuritë, aftësitë dhe kompetencat e nevojshme për të adresuar sfidat komplekse ligjore në kontekstet kombëtare dhe ndërkombëtare përmes edukimit të avancuar, me studentin në qendër dhe kërkimit shkencor cilësor, duke kontribuar kështu në transformime progresive ligjore në Kosovë dhe më gjerë.
Ky program në të drejtën penale ofron kualifikime të vlefshme për ata që synojnë të marrin rolin udhëheqës në këto procese. Në veçanti, studentët do të fitojnë aftësitë e nevojshme për të ndjekur krimet më të rënda dhe për të luftuar fenomenet e krimit transnacional që shpesh janë të ndërlidhura me korrupsionin e brendshëm. Për më tepër, ky program do të përgatisë studentët për të kontribuar në reformimin e institucioneve dhe për të përmbushur standardet ndërkombëtare në drejtësinë penale, duke e përgatitur Kosovën për integrim më të madh në strukturat evropiane të drejtësisë penale.
Programi është ideal për studentët që aspirojnë të kenë karrierë në institucionet e sundimit të ligjit përfshirë gjykata, institucione për zbatimin e ligjit, por edhe në organizatat ndërkombëtare të drejtësisë, këshillim të politikave, ndërmjetësim, institucionet akademike dhe kërkimore, OJQ dhe agjencitë e zbatimit të ligjit ose inteligjencës. Me ekspertizë në fusha ndërdisiplinore si kriminologjia, të drejtat e njeriut dhe siguria kibernetike, të diplomuarit mund të punojnë edhe si konsulentë ligjorë dhe analistë politikash duke kontribuar në drejtësi, parandalimin e krimit dhe inovacionin ligjor.
Pas përfundimit me sukses të programit LLM Juridik Penal, studentët do të demonstrojnë këto njohuri, shkathtësi dhe kompetenca:
Njohuri:
– demonstrojnë njohuri për ligjet penale kombëtare dhe ndërkombëtare, duke përfshirë sistemet krahasuese të së drejtës penale dhe implikimet e të drejtave të njeriut në procedurat penale;
– analizojnë dhe vlerësojnë në mënyrë kritike teoritë dhe konceptet bashkëkohore të kriminologjisë dhe tendencat në zhvillim në drejtësinë penale;
– kuptojnë sfidat ligjore dhe kuadrin rregullator në lidhje me krimin kibernetik dhe sigurinë kibernetike, duke përfshirë ndikimin e teknologjisë dixhitale në krimin dhe hetimin penal;
– përvetësojnë njohuri dixhitale për kërkime akademike;
Shkathtësi:
– zhvillojnë aftësi të avancuara kërkimore, duke përfshirë aftësinë për të hartuar dhe ekzekutuar projekte kërkimore ligjore duke përdorur metodologji shkencore dhe qasje heuristike;
– zbatojnë mendimin kritik dhe arsyetimin ligjor për të analizuar çështjet komplekse penale, për të interpretuar statutet dhe precedentët ligjorë dhe për të zhvilluar argumente ligjore të mbështetura mirë;
– demonstrojnë aftësi praktike në teknikat dhe taktikat e hetimit penal, duke përfshirë mbledhjen e provave, analizën mjeko-ligjore dhe aplikimin e teknologjive të avancuara hetimore;
Kompetenca:
– zbatojnë standardet etike dhe përgjegjësinë profesionale në praktikën e së drejtës penale, duke përfshirë ndjeshmërinë ndaj çështjeve të të drejtave të njeriut dhe ekzekutimin e drejtë të sanksioneve penale;
– integrojnë njohuri nga disiplina të ndryshme, duke përfshirë ligjin, kriminologjinë dhe sigurinë kibernetike, për të adresuar çështje komplekse ligjore dhe për të propozuar zgjidhje novatore në një kontekst global;
– zhvillojnë aftësitë e komunikimit me gojë dhe me shkrim, duke mundësuar avokim efektiv dhe paraqitje të argumenteve ligjore;
– hartojnë një projekt kërkimor dhe mbrojnë temën e masterit.
Me rastin e përfundimit të studimeve, studentët fitojnë thirrjen akademike: Master në Juridik Penal (LLM)
Studimet në Programin Master Juridik Penal zgjasin 1 vit, 60 ECTS me gjithsej 2 semestra.
Qëllimi i lëndës është që studentët të njohin të drejtat penale të disa prej vendeve që përfaqësojnë modele dhe sisteme të ndryshme, të njohin metodat e së drejtës penale krahasuese, si dhe të zhvillojnë shkathtësitë e tyre për analiza krahasuese mbi çështjet e së drejtës penale në përgjithësi. Kështu studentët fitojnë njohuri shkencore dhe aftësi në lidhje me të drejtën penale krahasuese.
Metodologjia e hulumtimit shkencorë ka për qëllim t’u ofroj studentëve konceptet themelore të metodave lulumtuese për të realizuar në mënyrë të pavarur një hulumtim shkencor, nje punim diplome, një shkrim apo prezantim akademik. Lënda do të fokusoget në 5 faza kryesore të kërkimit shkencor; Të menduarit për hulumtimin; Përgatitja e Hulumtimit; Mbledhja e të dhënave; Analiza e të dhënave; dhe Paraqitja e të dhënave.
Krimi Kibernetik ka marrë përmasa të gjëra dhe brengosëse në shumë shtete të zhvilluara dhe në ato që pretendojnë një zhvillim tekniko-teknologjik e informatik në gjitha sferat e jetës, duke përfshirë edhe vendin tonë dhe shumë shtete fqinje, një nga qëllimet e kësaj lënde është trajtimi saj në vija të përgjithshme të fenomenologjisë dhe etiologjisë së kriminalitetit kompjuterik, zbulimi dhe ndriçimi i shkaqeve dhe pasojave që shtyjnë individët dhe grupet e caktuara në kryerjen e veprave penale nga fusha e kriminalitetit kompjuterik, etj.
Qëllimi i kësaj lënde është pajisja e studentëve me njohuri të thelluara shkencore në zbulimin e kriminalitetit, zbulimin e kryerësve dhe zbulimin në përgjithësi lidhur me veprat penale të kryera. Gjithashtu studentëve do t’iu ofrohen informacione mbi metodat dhe teknikat më të avansuara bashkë me eksperiencat referente lidhur me parandalimin e tërë modaliteteve të kriminalitetit, në veçanti ato të krimit të organizuara dhe modaliteteve tjera të sofistikuara.
Qëllimi i lëndës Etiologjia kriminale ka analizat dhe studimet që mundohen të arrijnë të tregojnë cilat janë lidhjet kauzale në mes të rrethanave e faktorëve të ndryshëm dhe kriminalitetit në një shoqëri. Po ashtu në këtë lëndë do të studiohen shkaqet dhe rrethanat që kanë të bëjnë me të gjitha sjelljet kriminale dhe dukuritë tjera negative në shoqëri duke ardhë deri te njohja, përcaktimin dhe analizën e faktorëve, shkaqeve, burimeve dhe rrënjëve të dukurisë së kriminalitetit.
Kjo lëndë ka për qëllim që të ofrojë njohuri të avancuara mbi krimin e organizuar transnacional që ka të bëjë me veçoritë juridiko-penale, kriminologjike. Gjithashtu synon përgatitja dhe aftësimi i juristëve të ardhshëm, e sidomos të atyre që punojnë në organet e judikaturës penale (polici, prokurori, gjykata, institucione korrektuese etj., si dhe në organet e tjera që merren me këtë problematikë), që të përdorin me sukses njohuritë e fituara në fushën e Krimit të organizuar transnacional me theks të veçantë luftimin dhe parandalimin e suksesshëm të tij.
Qëllimi i lëndës “Të drejtat e njeriut në procedurë penale” në nivelin e studimeve Master, është njohja në nivel të thelluar e të drejtave të njeriut gjatë të gjitha fazave të rrjedhës së procedurës penale, përkatësisht të drejtave të cilët ju atribuohen pjesëmarrësve në cilësi të ndryshme në këtë procedurë, përfshirë personat e dyshuar për kryerje të veprave penale, të pandehurit, të akuzuarit, dëshmitarët, ekspertët, etj.
Qëllimi i lëndës “Teknikat dhe Taktikat e Hetimit Penal“, me përmbajtjen e sajë është e drejtuar në zbulimin dhe pengimin e veprave penale duke siguruar provat qofshin ato materiale apo personale në përpjekje të vazhdueshme që ato të lidhen dhe të harmonizohen me normat e ligjet mbi procedurën penale me një qasje kriminalistike në të gjitha fazat e procedures penale.
Studimet e kësaj lënde do të përqendrohen në tema të cilat kanë të bëjnë me shtrirjen e pushtetit të shtetit (territori dhe hapësirat jashtë sovranitetit), parimet si dhe teoritë që e përcaktojnë vendin e kryerjes së veprës penale. Pjesë e lëndës do të jenë edhe temat që kanë të bëjnë me ndihmën penale – juridike ndërkombëtare, përfshirë parimet, ekstradimin, azilin, ndihmën e “vogël” ndërkombëtare, bashkëpunimin policor, transferimin e procedurës penale mes shteteve, njohjen dhe ekzekutimin e aktgjykimeve penale mes shteteve dhe gjykatat penale ndërkombëtare.
Qëllimi i lëndës “Ekzekutimi i sanksioneve penale” është pajisja e studentëve me njohuri të avancuara në lidhje me faktin se lufta për parandalimin dhe luftimin e kriminalitetit nuk është e mjaftueshme nëse trajtohet vetëm në bazë të sanksioneve penale, veçanërisht atyre me heqje të lirisë, por edhe përmes metodave, masave dhe mënyrave të tjera, si: masat e shërimit të detyrueshëm, masave siguruese, masave edukative, lirimin me kusht, ndihmën post-penale, risocializimin, etj.
Lënda synon të prezantojë studentët me strukturën, funksionet dhe jurisprudencën e gjykatave ndërkombëtare penale, duke përfshirë Tribunalet për ish-Jugosllavinë dhe Ruandën, si dhe Gjykatën Ndërkombëtare Penale (ICC). Synimi është të avancohen njohuritë e studentëve për praktikat dhe sfidat ligjore që lidhen me ndjekjet penale ndërkombëtare për krime lufte, gjenocid dhe krime kundër njerëzimit, etj.
Përmes aktiviteteve në kuadër të lëndës, studentet do të avancohen dhe zhvillohen me njohuritë, shkathtësitë dhe kompetencat për zhvillimin historik te ndërmjetësimit, ndërmjetësimi pjesë e sistemit juridik, ndërmjetësimi në fushën Penale, veprat penale që mund të trajtohen në ndërmjetësim, negocioni i opsioneve për zgjidhjen e kontestit, arritja e marrëveshjes së ndërmjetësimit për veprat penale, marrëveshja e ndërmjetësimit dhe elementet e saj, efektet e marrëveshjes së ndërmjetësimit në rastet penale, etj.
