Lënda Imazhimi me rezonancë magnetike I ka për qëllim përvetësimin e njohurive teorike dhe shkathtësive përmes ligjëratave e orëve praktike të studentëve, të cilat do të mundësojnë ndërtimin e kompetencave profesionale për përfitimin e imazhit radiologjik me rezonancë magnetike bazuar në njohuritë e fituara.

Në mënyrë specifike lënda synon studentët të:

– Njihen me karakteristikat fizike të përfitimit të imazheve radiologjike me rezonancë magnetike që mundëson mbrojtjen personale, të pacientit dhe të kolegëve duke parandaluar dëmtime në njerëz dhe të vet aparatit të rezonancës.

– Njohin elementet bazike që kanë të bëjnë me planifikimin, pozicionimin, përgatitjen e sekvencave të rezonancës dhe realizimin e saktë të procedurës imazherike të kërkuar.

– Njohin aspektet e ndryshme të realizimit të procedurave me saktësi që mundësojnë përfitimin e imazhit kualitativ me rezonancë duke parandaluar nevojën e përsëritjes së procedurës dhe zgjatjes së kohës së imazhimit.

Lënda Imazhimi me tomografi të kompjuterizuar I ka për qëllim përvetësimin e njohurive teorike dhe shkathtësive përmes ligjëratave e pastaj orëve praktike të studentëve, të cilat do të mundësojnë ndërtimin e kompetencave profesionale për përfitimin e imazhit radiologjik me tomografi të kompjuterizuar bazuar në njohuritë e fituara.

– Njihen me karakteristikat fizike të përfitimit të imazheve radiologjike me tomografi të kompjuterizuar që mundëson mbrojtjen personale, të pacientit dhe të kolegëve nga rrezatimi jonizues.

– Aftësohen studentët të dallojnë principet e punës së tomografisë së kompjuterizuar nga radiografia konvencionale, përkundër ngjashmërive që kanë, për të mbrojtur më mirë pacientin me mbrojtje personale duke përdorur mbrojëse të plumbit.

– Njohin aspektet e ndryshme të realizimit të procedurave me saktësi që mundësojnë përfitimin e imazhit kualitativ me tomografi të kompjuterizuar duke parandaluar nevojën e përsëritjes së procedurës dhe ekspozimit të dyfishtë ndaj rrezeve jonizuese.

Qëllimi i lëndës Farmakologjia dhe përdorimi i mjeteve të kontrastit në radiologji është që studentët të fitojnë njohuri për barnat dhe mjetet e kontrastit, si dhe ndikimin e tyre në sistemin biologjik.

– Njohja me efektet anësore, ndërveprimet potenciale në mes agjentëve të ndryshëm farmakoterapeutikë dhe përgjigjja adekuate, efektive e profesionale në praktikën klinike që ka synim administrimin e sigurtë në pacientë dhe përdorimin racional të tyre.

Lënda ka për qëllim përvetësimin nga studentët të njohurive teorike dhe praktike mbi rolin e përdorimit të rrezatimit jonizues për qëllime trajtimi (kurimi) dhe rëndësinë e mbrojtjes nga rrezatimi në radioterapi.

Në mënyrë specifike lënda synon të:

– Aftësojë studentët në aspektin e njohjes së funksioneve themelore të aparateve dhe metodave mjekësore për qëllime trajtimi ku aplikohen rrezatimet jonizuese;

– Kuptojnë rolin e teknikut në realizimin profesional të trajtimit radioterapeutik;

– Aftësojë studentët për të përdorur aparatet dhe metodat mjekësore për qëllime trajtimi;

– Aftësojë studentët për të përdorur pajisje të ndryshme për mbrojtje nga rrezatimi.

Lënda ka për qëllim përvetësimin e njohurive praktike të studentëve, të cilat do të mundësojnë njohuri profesionale për përfitimin e imazhit radiologjik me TK bazuar në vendosjen adekuate të pozitës së pacientit dhe njohuri për përfitimin e imazhit sa më të saktë që realizohet në mënyrë të pavarur nga vet tekniku.

Në mënyrë specifike lënda synon studentët të:

– Njihen me karakteristikat fizike të rrezeve rentgen që mundësojnë mbrojtjen personale, të pacientit dhe të kolegëve nga rrezatimi i panevojshëm.

– Aftësojnë studentët të njohin karakteristikat dhe kërkesat e secilit incizim radiologjik konvencional si parakusht për realizimin e suksesshëm të vet imazhimit të kërkuar.

– Njohin elementet bazike që kanë të bëjnë me planifikimin, pozicionimin, përgatitjen dhe realizimin e saktë të procedurës imazherike të kërkuar.

– Njohin aspektet e ndryshme të realizimit të procedurave me saktësi që mundësojnë përfitimin e imazhit kualitativ radiologjik duke parandaluar nevojën e përsëritjes së procedurës dhe ekspozimit të pacientit ndaj rrezatimit të përsëritur.

Kjo lëndë synon të përmirësojë aftësitë komunikuese të studentëve në gjuhë angleze. Lënda do të zhvillojë njohuritë ekzistuese dhe aftësitë gjuhësore të studentëve duke u mundësuar atyre të:

– Të përmirësojnë aftësitë e përgjithshme të të dëgjuarit dhe kuptuarit të gjuhës së huaj;

– Të pasurojnë fjalorin nga fusha e mjekësisë/radiologjisë përmes ushtrimeve gjuhësore të të dëgjuarit dhe të folurit;

– Të jenë në gjendje të mendojnë në mënyrë kritike.

Lënda ka për qëllim përvetësimin e njohurive teorike dhe shkathtësive praktike të studentëve, të cilët do të mund të ndërtojnë dhe zhvillojnë kompetenca menaxheriale në fushën e teknologjisë informative në shëndetësi. Studentët, pas përfundimit, duhet të jenë në gjendje të kuptojnë se çka janë Sistemet e Informacionit dhe cila është rëndësia e tyre në sistemin shëndetësor të një shteti.

Në mënyrë specifike lënda synon të:

– Të aftësojë studentët të kenë një koncept se çka është një Sistem i Informimit.

– Të prezantojë nevojat bazike për planifikimin e një sistemi të informacionit (resurset dhe kapacitetet), si dhe parametrat që duhet të merren parasysh për planifikimin e një sistemi të informacionit.

– Të përgatisë studentët për të kuptuar cila është struktura organizative e Sistemit Informativ Shëndetësor.

Lënda ka për qëllim përvetësimin e njohurive teorike dhe shkathtësive përmes ligjeratave e pastaj orëve praktike të studentëve, të cilat do të mundësojnë ndërtimin e kompetencave profesionale për përpilimin dhe zbatimin e protokoleve adekuate për imazhimin e pjesëve të trupit me imazhim me rezonancë magnetike – bazuar në njohuritë e fituara.

Në mënyrë specifike lënda synon studentët të:

– Njihen me karakteristikat specifike të protokoleve të imazhimit me rezonancë magnetike që mundësojnë shërbimin adekuat të pacientit.

– Aftësohen studentët të dallojnë principet e përcaktimit të protokoleve të punës me rezonancë magnetike.

– Njihen me përdorimin e saktë të injektorit automatik për aplikimin e kontrastit dhe punën e sinkronizuar që bëhet për realizimin e procedurave imazherike me rezonancë me protokole të ndryshme në përfitimin e imazheve me kohë të kalkuluar.

Lënda ka për qëllim përvetësimin e njohurive teorike dhe shkathtësive përmes ligjeratave e pastaj orëve praktike të studentëve, të cilat do të mundësojnë ndërtimin e kompetencave profesionale për përpilimin dhe zbatimin e protokoleve adekuate për imazhimin e pjesëve të trupit me imazhim me tomografi të kompjuterizuar – bazuar në njohuritë e fituara.

Në mënyrë specifike lënda synon studentët të:

– Njihen me karakteristikat e protokoleve të imazhimit me tomografi të kompjuterizuar që mundësojnë shërbimin adekuat të pacientit.

– Aftësohen studentët të dallojnë principet e përcaktimit të protokoleve të punës me tomografi të kompjuterizuar.

– Aftësojnë studentët të njohin karakteristikat dhe kërkesat e secilit incizim me tomografi të kompjuterizuar si parakusht për përcaktimin dhe realizimin e suksesshëm të protokolit të imazhimit të pjesës së kërkuar me tomografi të kompjuterizuar.

Qëllimi i kësaj lënde është të pajisë studentët me njohuri themelore dhe aftësi praktike në fushën e radiologjisë emergjente, duke i aftësuar ata të reagojnë në mënyrë të duhur në situata urgjente kur jeta e pacientit është në rrezik.

Lënda synon:

– T’i njohë studentët me parimet dhe teknikat e imazherisë radiologjike që përdoren në rastet emergjente, me theks të veçantë në identifikimin dhe diagnostikimin e shpejtë të gjendjeve që rrezikojnë jetën.

– Të fitojnë njohuri mbi modalitetet më të zakonshme të imazherisë, siç janë rrezet X, skaneri CT dhe ultrazëri, si dhe përdorimin e tyre të duhur në situata të ndryshme traumatike dhe në kujdesin akut.

– Të jenë në gjendje të ndihmojnë pacientët në gjendje të rëndë gjatë ekzaminimeve radiologjike, duke siguruar që këto të kryhen në mënyrë të sigurt, të saktë dhe efikase në kushte me presion të lartë kohor. Do të theksohet rëndësia e bashkëpunimit ndërdisiplinor, etika profesionale dhe komunikimi efektiv me ekipin mjekësor emergjent.

Qëllimi i lëndës është të pajisë studentët me njohuri dhe shkathtësi të avancuara praktike në përdorimin e Tomografisë së Kompjuterizuar (TK), duke përfshirë edhe aplikimet e saj të specializuara në diagnozën mjekësore bashkëkohore.

– Të njohin dhe ushtrojnë praktikisht skanime specifike si: Angjiografia me TK (vizualizimi i enëve të gjakut), Venografia me TK (shqyrtimi i sistemit venoz), dhe Koronarografia me TK (vlerësimi jo-invaziv i arterieve koronare të zemrës). Studentët do të mësojnë të kuptojnë indikacionet mjekësore për këto skanime, përgatitjen e pacientit, dozimin e kontrastit, pozicionimin korrekt dhe analizimin fillestar të rezultateve.

– Të përvetësojnë kompetenca profesionale në përgatitjen dhe realizimin e ekzaminimeve radiologjike me TK, me fokus të veçantë në përfitimin e imazheve të cilësisë së lartë. Do të theksohet rëndësia e teknologjisë së avancuar, njohja e parametrave teknikë, si dhe aplikimi i protokolleve të duhura për skanime të ndryshme klinike.

Qëllimi kryesor i lëndës është arritja e njohurive teorike dhe zhvillimi i aftësive kritike dhe analitike tek studentët lidhur me komunikimin dhe marrëdhëniet ndërpersonale që do të ndikojnë në zhvillimin e shkathtësive për komunikim efektiv.

Në mënyrë më specifike, objektivat e lëndës pasqyrohen si në vijim:

– Studentët do të mësojnë bazën konceptuale të komunikimit dhe do ta kuptojnë funksionimin e këtij procesi. Në këtë mënyrë ata do të kuptojnë komunikimin si një domosdoshmëri dhe do të zhvillojnë mësimin në kontekstin e zbatimit praktik.

– Studentët do ta kuptojnë dallimin midis komunikimit verbal dhe jo-verbal dhe rëndësinë e komunikimit terapeutik.

– Do ta kuptojnë rëndësinë e empatisë në krijimin e marrëdhënieve të mira ndërpersonale dhe në ofrimin e kujdesit shëndetësor cilësor infermieror.

Qëllimi i lëndës është një deklaratë e përgjithshme dhe e gjerë e qëllimit të mësimdhënies, d.m.th. tregon atë që mësimdhënësi synon të përfshijë gjatë ligjëratave. Qëllimet duhet të shkruhen nga këndvështrimi i mësimdhënësit për të treguar përmbajtjen e përgjithshme dhe drejtimin e lëndës. Kjo lëndë studentëve iu ofron njohuri për metodat themelore të diagnostikimit dhe trajtimit të situatave në të cilat është e domosdoshme ofrimi i ndihmës së parë.

Në mënyrë specifike lënda synon të:

– Njohin sëmundjet akute dhe kronike të akutizuara.

– Njohin trajtimin e lëndimeve, djegieve, gjakderdhjeve dhe helmimeve.

– Zbatojnë metodat bashkëkohore të reanimimit kardiopulmonar.

Qëllimi i lëndës është përvetësimi i njohurive teorike dhe shkathtësive praktike të cilat do të mundësojnë ndërtimin e kompetencave profesionale për përfitimin e imazheve në 3D rekonstruime bazuar në njohuritë e fituara.

Në mënyrë specifike lënda synon:

– Njohjen e karakteristikave fizike të përfitimit të imazheve radiologjike me rezonancë magnetike që mundëson mbrojtjen personale, të pacientit dhe të kolegëve duke parandaluar dëmtime në njerëz dhe të vet aparatit të rezonancës.

– Poashtu, do të njohin karakteristikat dhe kërkesat e secilit incizim rezonancë magnetike si parakusht për realizimin e suksesshëm të vet imazhimit të pjesës së kërkuar. Njohjen e elementeve bazike që kanë të bëjnë me planifikimin, pozicionimin, përgatitjen e sekvencave të rezonancës dhe realizimin e saktë të procedurës imazherike të kërkuar.

– Njohin aspektet e ndryshme të realizimit të procedurave me saktësi që mundësojnë përfitimin e imazhit kualitativ me rezonancë duke parandaluar nevojën e përsëritjes së procedurës dhe zgjatjes së kohës së imazhimit.

Qëllimi i lëndës është të ofrojë një kuptim të thellë të rreziqeve të mundshme që lidhen me sëmundjet infektive dhe mënyrën e mbrojtjes gjatë kryerjes së ekzaminimeve radiologjike.

– Kjo lëndë synon t’i ofrojë studentëve njohuri të nevojshme mbi rrezikun e mundshëm të transmetimit të sëmundjeve që përhapen përmes kontaktit dhe sekreteve të trupit, duke siguruar kështu mbrojtjen e personelit dhe pacientëve gjatë procesit të imazherisë.

Qëllimi kryesor i lëndës Radiologjia Pediatrike është të ofrojë njohuri dhe aftësi të thella për aplikimin e teknikave dhe metodave radiologjike në diagnostikimin dhe trajtimin e pacientëve pediatrikë.

– Lënda synon të përgatisë studentët për të kuptuar karakteristikat e veçanta të trupit të fëmijëve dhe të mundësive që ofron radiologjia në trajtimin e sëmundjeve dhe kushteve të ndryshme shëndetësore që prekin fëmijët.

– Studentët do të zhvillojnë aftësi për të interpretuar imazhet radiologjike të pacientëve të vegjël dhe për të aplikuar praktikat më të mira për sigurimin e rezultateve të sakta dhe të sigurta.

Lënda Praktika radiologjike V ka për qëllim përvetësimin e njohurive praktike të studentëve, të cilat do të mundësojnë njohuri profesionale për përfitimin e imazhit radiologjik me RM bazuar në vendosjen adekuate të pozitës së pacientit dhe njohuri për përfitimin e imazhit sa më të saktë që realizohet në mënyrë të pavarur nga vet tekniku.

Në mënyrë specifike lënda synon studentët të:

– Njihen me karakteristikat e RM, e cila është një metodë diagnostikimi në gjendje të japë pamje të detajuara anatomike 3D, pa e ekspozuar pacientin në rrezatime të rrezikshme.

– Njihen me kundërindikacionet për realizimin e RM, siç janë: stimuluesi kardiak, objektet e huaja metalike në trupin e pacientit, shtatzënia (3 mujori i parë), klipsi hemostatik, implanti i veshit të mesëm.

– Njohin elementet bazike që kanë të bëjnë me planifikimin, pozicionimin, përgatitjen dhe realizimin e saktë të procedurës imazherike të kërkuar.

– Njohin aspektet e ndryshme të realizimit të procedurave me saktësi që mundësojnë përfitimin e imazhit kualitativ radiologjik duke parandaluar nevojën e përsëritjes së procedurës.

Qëllimi i lëndës Shkathtësitë e Studimit është të ndihmojë studentët të zhvillojnë një bazë të fortë për sukses akademik dhe profesional në fushën e radiologjisë. Kjo lëndë është projektuar për të pajisur studentët me njohuri dhe aftësi praktike që mbështesin efikasitetin në procesin e të mësuarit dhe përgatitjen për karrierë.

– Përvetësojnë teknika të menaxhimit të kohës, duke mësuar si të prioritizojnë detyrat dhe të arrijnë objektivat e tyre akademike dhe profesionale në mënyrë të organizuar dhe efektive.

– Zhvillojnë aftësi në shkrimin akademik, duke përfshirë teknika të hulumtimit, strukturimin e eseve dhe projekteve, si dhe referimin sipas standardeve të pranuara ndërkombëtare.

Qëllimi i kësaj lënde është të pajisë studentët me njohuri themelore dhe aftësi praktike në fushën e edukimit dhe promovimit shëndetësor, me fokus të veçantë në rolin që tekniku i radiologjisë luan në përmirësimin e shëndetit publik dhe edukimin e pacientëve. Të njohin parimet bazë të edukimit shëndetësor, mënyrat efektive të komunikimit me pacientët dhe komunitetin, si dhe strategjitë për promovimin e stilit të shëndetshëm të jetesës.

Lënda synon:

– Të zhvillojë tek studentët një vetëdije profesionale për rëndësinë e informimit të pacientëve mbi procedurat radiologjike, përgatitjen për ekzaminime, përdorimin e mbrojtjes nga rrezatimi, si dhe motivimin e tyre për të ndjekur këshillat shëndetësore.

– Të aftësohen për të identifikuar faktorët rrezikues për shëndetin, për të kontribuar në parandalimin e sëmundjeve përmes edukimit shëndetësor, dhe për të qenë pjesë aktive në fushatat dhe aktivitetet promovuese në institucionet shëndetësore dhe në komunitet.

Lënda Aplikimi i Inteligjencës Artificiale në Imazheri ka për qëllim të rrisë njohuritë e studentëve për mundësitë që ofron IA në rritjen e saktësisë dhe shpejtësisë në interpretimin e imazheve mjekësore, si dhe të zhvillojë aftësitë për të krijuar, trajnuar dhe vlerësuar modele të inteligjencës artificiale për zgjidhjen e problemeve të ndryshme në fushën e radiologjisë dhe imazherisë mjekësore.

– Kjo lëndë synon t’u ofrojë studentëve një kuptim të thelluar të mënyrave në të cilat inteligjenca artificiale mund të përdoret për të përmirësuar analizën dhe interpretimin e imazheve mjekësore.

– Të zhvillojë aftësi për aplikimin e algoritmeve të përpunimit dhe analizës së imazheve, duke përfshirë teknikat e segmentimit dhe klasifikimit, për të ndihmuar në identifikimin e anomalive dhe përmirësimin e saktësisë së diagnostikimit.

– Studentët do të shqyrtojnë rëndësinë etike dhe sfidat që lidhen me përdorimin e IA-së në mjekësi, siç janë privatësia e të dhënave.

Qëllimi i kësaj lënde është të pajisë studentët me njohuri themelore mbi bazat e radiologjisë interventive dhe rolin e saj në diagnostikimin dhe trajtimin minimalisht invaziv të sëmundjeve të ndryshme. Përmes kësaj lënde, studentët do të njihen me teknikat më të përdorura të imazherisë mjekësore që shërbejnë si udhërrëfyes në procedurat interventive, përfshirë: radiografinë (rrezet X), tomografinë e kompjuterizuar (CT), rezonancën magnetike (MRI), fluoroskopinë dhe ultrazërin (USG).

– Studentët do të fitojnë njohuri për mënyrën se si radiologët intervent përdorin këto teknologji për të kryer procedura të ndryshme mjekësore në organe dhe sisteme të ndryshme të trupit të njeriut, si: biopsitë, drenazhet, vendosja e kateterëve, embolizimet, dhe ndërhyrje vaskulare (si angiografitë dhe venografitë).

– Lënda synon të zhvillojë tek studentët një kuptim të qartë mbi indikacionet, përgatitjen e pacientit, sigurinë, menaxhimin e rrezikut dhe aspektet etike të procedurave të radiologjisë interventive, duke i përgatitur ata për të bashkëpunuar në mënyrë profesionale në mjediset klinike.

Qëllimi i lëndës është të pajisë studentët me njohuri bazë teorike për sigurimin e cilësisë dhe mjetet e saj të përcaktuara, dhe të jenë në gjendje t’i aplikojnë në mënyrë aktive këto në kuadrin e një grupi të projektit. Studentët do të kuptojnë strukturën bazë të projekteve dhe zotërojnë aftësitë për të punuar individualisht me detyra të përcaktuara të punës.

– Të njihen me rëndësinë e masave teknike për sigurimin e cilësisë të përdorura në teknologjinë e radiologjisë dhe për të vlerësuar ndikimin e sigurimit të cilësisë teknike në kujdesin optimal të pacientit.

– Lënda ofron horizonte të reja të metodave dhe teknologjisë më bashkëkohore të aplikuara në mjekësi, si për diagnostikim dhe kurim.

Lënda ka për qëllim sqarimin e përgjithshëm të metodologjisë së punës kërkimore-shkencore dhe terminologjisë përkatëse. Përgatitjen e studentëve për kërkim shkencor dhe aplikimin e metodave shkencore në fushën e teknik të radiologjisë. Zhvillimin e aftësive për përpilimin, zbatimin dhe prezantimin e një projekti përfundimtar që ndërlidhet me radiologjinë dhe teknika moderne radiologjike.

– Njohja me metodologjitë kërkimore (kuantitative, kualitative dhe mikse).

– Hartimi i një projekti të plotë diplomimi duke përfshirë: zgjedhjen e temës, rishikimin e literaturës, dizajnin hulumtues, mbledhjen dhe analizën e të dhënave.

– Zhvillimi i aftësive praktike për prezantimin dhe mbrojtjen e punimit të diplomës.

Qëllimi i kësaj lënde është të pajisë studentët me njohuri praktike dhe aftësi profesionale në fushën e Rezonancës Magnetike, duke i përgatitur ata për zbatimin e teknikave të avancuara të imazherisë diagnostike në praktikën klinike.

Lënda synon të:

– Aftësojë studentët për të kuptuar dhe zbatuar në mënyrë të saktë teknikat e Angiografisë me Rezonancë Magnetike, duke përfshirë metodën 3D TOF (Time of Flight) dhe angiografinë me kontrast intravenoz (i.v);

– Përgatisë studentët për menaxhimin dhe kujdesin ndaj pacientit gjatë realizimit të Rezonancës Magnetike Kardiake, duke përfshirë përgatitjen e duhur klinike dhe teknike;

– Thellojë njohuritë mbi përdorimin e sigurt dhe efektiv të pajisjeve të RM-së dhe rritjen e kompetencës profesionale në ambientet diagnostike moderne.