Fakulteti Juridik i Kolegjit AAB mori pjesë në konferencën kushtuar Lirisë së Mendimit, Ndërgjegjes dhe Besimit (FoRB), organizuar në bashkëpunim me Zyrën e OSBE-së për Institucione Demokratike dhe të Drejtat e Njeriut (ODIHR).
Ky aktivitet mblodhi në një tryezë të përbashkët dekanë, profesorë dhe studentë të drejtësisë dhe teologjisë nga universitete publike, kolegje private dhe shkolla teologjike/seminare, për të diskutuar mbi dimensionet praktike të FoRB në shoqërinë bashkëkohore.
Qëllimi i konferencës
Konferenca synoi thellimin e bashkëpunimit ndërinstitucional, ndarjen e përvojave akademike dhe rritjen e vetëdijes për rolin e lirisë fetare në mbrojtjen e të drejtave themelore të njeriut.
Në konferencë, ekspertët ndërkombëtarë dhe vendas trajtuan marrëdhënien midis FoRB dhe të drejtave të tjera themelore, përfshirjen e kësaj teme në kurrikulat universitare dhe mënyrën se si studentët angazhohen me përmbajtje të ndërlidhura me lirinë e besimit.
Shembuj praktikë dhe rekomandime për mësimdhënie inovative
Panelistët sollën shembuj praktikë që ilustruan rëndësinë e FoRB për individët që i përkasin si komuniteteve minoritare ashtu edhe atyre shumicë, duke rekomanduar metoda inovative për mësimdhënien mbi “gjuhën e urrejtjes” me motivim fetar.
Gjatë diskutimeve, u theksua nevoja për rrjetëzim dhe bashkëpunim të qëndrueshëm ndërmjet universiteteve publike, kolegjeve private dhe institucioneve teologjike.
Ambasadori Gerard McGurk, theksoi rëndësinë e trajtimit të sigurisë së grave në zonat rurale, si dhe rolin kyç të udhëheqësve fetarë në adresimin e dhunës me bazë gjinore.
Kontributi i pjesëmarrësve dhe angazhimi i OSBE-së
Pjesëmarrësit kontribuan me ide të reja për fuqizimin e rolit të grave në shoqëri dhe për kapërcimin e viktimizimit dhe stigmatizimit. OSBE riafirmoi angazhimin e saj për një politikë të tolerancës zero ndaj çdo forme dhune ndaj grave.
