Adriana Kutllovci, e lindur më 21 prill 1979 në Prishtinë. Është dizajnere grafike, ligjëruese dhe artiste vizuale me një përvojë të gjatë dhe të larmishme në fushën e dizajnit grafik, artit bashkëkohor dhe edukimit artistik. Formimin e saj profesional e ka ndërtuar në Fakultetin e Arteve të Universitetit të Prishtinës, ku ka diplomuar në degën e Dizajnit Grafik dhe ka përfunduar edhe studimet postdiplomike, duke marrë titullin Magjistër i Dizajnit Grafik.
Karriera e saj nisi që në vitet e hershme të pasdiplomimit, kur punoi si asistente vullnetare në Dizajn Grafik në Art Qendrën e Fakultetit të Arteve në Prishtinë (2001/02), dhe më pas si ligjëruese e lëndës së Dizajnit Grafik në Fakultetin e Modës “Design Factory” (2007–2018). Që nga viti 2022, jep mësim në Kolegjin AAB – Fakultetin e Arteve, ku ligjëroj lëndët Tipografi (BA) dhe Dizajn Editorial (MA).
Prej vitit 2002, ëshë pjesë e ekipit të dizajnit grafik në Radio Televizionin e Kosovës (RTK), ku kontribuon në krijimin vizual të produksioneve televizive. Paralelisht, që nga viti 2007 është e angazhuar në studion artistike ‘Ars Albanica’, fillimisht si dizajnere dhe që nga viti 2013 si menaxhere projektesh artistike dhe kulturore.
Në vitin 2025, me vendim të Ministres së Arsimit, Shkencës, Teknologjisë dhe Inovacionit të Kosovës, zonjës Arbërie Nagavci, është emëruar Kryesuese e Këshillit Shkencor për fushën shkencore “Studime gjuhësore, kulturore dhe historike”, me mandat katërvjeçar – një detyrë që e konsideron nder dhe përgjegjësi të madhe.
Është autore dhe bashkëautore e dhjetëra ekspozitave personale dhe mbi njëqind ekspozitave kolektive në nivel kombëtar dhe ndërkombëtar. Ka përfaqësuar Kosovën dhe artin shqiptar në ekspozita prestigjioze si: “Mini Print International of Cadaqués” (Spanjë, Francë, Angli), “Lessedra Art Gallery” në Bullgari, “Visual AIDS” në Nju Jork – kjo ekspozitë është e hapur në galerinë Berry Campbell në New York e regjistruar ne Artsy.com, si dhe në bienale, trienale dhe festivale të dizajnit grafik, pikturës dhe vizatimit në Evropë dhe më gjerë. Ekspozitat e saj personale më të spikatura janë: “Lotët e Detit” (2013), “Ngjyrat dhe Trajtat” (2021–2022), si dhe “Në kërkim të yllit tim” (2022).
Gjatë karrierës saj ka marrë një sërë shpërblimesh, mes të cilave veçon: Çmimin e Parë për dizajnin e pullave postare të Postës së Kosovës (në disa edicione), Çmimin “Plaketa e Artë” në Zagreb Full Color (2019) dhe Çmimin e Parë të MASHT për librin shkollor “Edukatë Figurative 3” (bashkëautore). Në vitin 2024, u nderua me çmimin special në “Festivalin Ndërkombëtar të Posterit” në Prishtinë.
Përvoja e saj gjatë si dizajnere, artiste dhe pedagoge e lidhur ngushtë me zhvillimet bashkëkohore në artin grafik dhe edukimin vizual, i ka dhënë mundësi të ndikoj në formimin artistik të shumë gjeneratave të reja, si dhe të kontribuoj në ndërkombëtarizimin e artit dhe kulturës shqiptare.
Adriana është e martuar dhe ka një fëmijë. Jeton në Prishtinë.
