Qendra e Karrierës në Kolegjin AAB ka organizuar vizitë studimore të studentëve të Fakultetit të Psikologjisë në repartin e psikiatrisë, të shoqëruar nga dekani Naim Telaku dhe udhëheqësja e qendrës Jehona Rukovci. Vizita u realizua në Spitalin Psikiatrik për të Rritur dhe Spitalin Psikiatrik për Fëmijë në Qendrën Klinike Universitare të Kosovës, ku u mirëpritën nga drejtuesit Faton Kutllovci dhe Adelina Ahmeti Pronaj.
Ata ndanë me studentët njohuritë dhe përvojat e tyre në këto spitale, ndërsa u prezantuan infrastrukturën dhe shërbimet që ofrojnë për pacientë. Studentët mësuan për llojet e shërbimeve terapeutike dhe diagnostike që ofrohen, si dhe njohën nga afër përfituesit e këtyre shërbimeve.
Pjesë e diskutimeve ishin edhe ndryshimet që janë bërë viteve të fundit në reparte për këtë grup të shoqërisë, ndërsa dy palët u zotuan për thellim të bashkëpunimit në të ardhmen, që parasheh zhvillimin profesional të studentëve dhe përmirësimin e mëtutjeshëm të shërbimeve të shëndetit mendor në vend.