Melisa Osmani, studente e Fakultetit të Kulturës Fizike në Kolegjin AAB, ka bërë një përfaqësim dinjitoz derisa u rendit në vendin e dytë në Lojërat Akademike Çeke në Futsall , duke përmbyllur me sukses edhe vitin akademik si studente në programin ERASMUS.
Këto lojëra organizohen çdo vit nga Shoqata Çeke e Sporteve Universitare (ČAUS), dhe mbahen në universitetin e përzgjedhur. Këtë vit ato u organizuan në Universitetin e Bohemisë Jugore, derisa studentja Osmani e Kolegjit AAB arriti sukses të madh si pjesëmarrëse, ku përfaqësoi njërën nga universitetet më të njohura çeke, atë të Masaryk.
Ajo zuri vendin e dytë në garat e futsall në konkurrencën e femrave, duke u shpallur nënkampion të Republikës çeke në këtë sport.
Melisa Osmani falënderoi Kolegjin AAB për mundësinë e dhënë, ndërsa foli edhe për arritjen në këto gara.
“Ka qenë një eksperiencë shumë e mirë, madje edhe organizatorët ishin të befasuar që kishte lojtarë nga Kosova. Falënderoj Kolegjin AAB për mundësinë e dhënë që të jem një vit student në Universitetin Masaryk të Çekisë, në kuadër të programit ERASMUS”, u shpreh Osmani.
Kolegji AAB, përmes programit ERASMUS vazhdimisht iu ofron studentëve mundësinë që sukseset e tyre t’i shënojnë edhe jashtë vendit, duke përfaqësuar kështu aftësitë e zotësitë që ata kanë marrë gjatë viteve të studimit.
