Kompjuterikë dhe FinTech

Qëllimi dhe profili i programit

Programi i studimeve BSc “Kompjuterikë dhe FinTech” synon të përgatisë profesionistë të aftë në ndërthurjen e teknologjisë së informacionit, shkencës kompjuterike dhe financës moderne, duke iu përgjigjur nevojave në rritje të tregut vendor dhe ndërkombëtar për ekspertë në teknologjitë financiare. Programi ofron një qasje ndërdisiplinore që kombinon njohuritë teorike me aftësitë praktike në zhvillimin e zgjidhjeve FinTech, analizën e të dhënave, sigurinë kibernetike, inteligjencën artificiale, blockchain dhe sistemet financiare digjitale.

Programi BSc Kompjuterikë dhe FinTech përfshin dy specializime:

• Kriptovaluta dhe Blockchain
• Banka Digjitale dhe Sigurime

Përmes këtyre specializimeve, programi synon të zhvillojë profesionistë me kompetenca teknike, analitike, kërkimore dhe etike, të aftë për të projektuar, zhvilluar dhe menaxhuar teknologji inovative në sektorët financiarë, bankarë dhe të biznesit.

Misioni

Misioni i programit BSc Kompjuterikë dhe FinTech është të përgatisë studentët për tregun vendor dhe ndërkombëtar të punës përmes mësimdhënies bashkëkohore, kërkimit shkencor dhe praktikës profesionale. Programi synon që studentët të ndërthurin shkencën kompjuterike me financën dhe inovacionin digjital, duke zhvilluar aftësi për të krijuar zgjidhje teknologjike moderne dhe për të kontribuar në zhvillimin e sektorëve financiarë dhe të biznesit.

Në përputhje me misionin e tij, programi BSc Kompjuterikë dhe FinTech synon të zhvillojë njohuri ndërdisiplinore, aftësi kërkimore dhe formim profesional e etik tek studentët në fushën e teknologjisë financiare, duke kontribuar në zhvillimin e qëndrueshëm ekonomik dhe shoqëror.

Kujt i dedikohet programi BSc Kompjuterikë dhe FinTech?

Programi i studimit BSc Kompjuterikë dhe FinTech u dedikohet studentëve të interesuar në teknologjinë informative (IT), shkencën kompjuterike dhe financën moderne. Programi është i përshtatshëm për kandidatët që synojnë të zhvillojnë karrierë në sektorët e bankave, pagesave digjitale, kompanive FinTech, sigurimeve dhe platformave financiare digjitale.

Gjithashtu, programi u dedikohet individëve që synojnë karrierë në programim dhe zhvillim softuerik, analizë të të dhënave, siguri kibernetike, sisteme financiare dhe teknologji bankare. Në mënyrë më të gjerë, programi synon të përgatisë profesionistë të aftë për të ndërthurur teknologjinë dhe financën, duke iu përgjigjur kërkesës së lartë për ekspertë në fushën e teknologjive financiare.

Objektivat e programit të studimit

Programi i studimit BSc Kompjuterikë dhe FinTech ka për qëllim:

• Të zhvillojë tek studentët njohuri të avancuara në teknologjinë e informacionit, shkencën kompjuterike, financën dhe ekonominë digjitale.
• Të pajisë studentët me aftësi për të hartuar, zhvilluar dhe menaxhuar zgjidhje inovative FinTech duke përdorur teknologji moderne si Blockchain, Inteligjenca Artificiale dhe Cloud Computing.
• Të nxisë të menduarit kritik, analitik dhe kërkimor përmes metodave shkencore dhe analizës së të dhënave, duke mbështetur inovacionin e bazuar në të dhëna dhe vendimmarrjen efektive në sektorin financiar.
• Të përgatisë profesionistë me etikë të lartë, kompetencë teknike dhe vizion të qëndrueshëm për të kontribuar në sigurinë kibernetike, transparencën dhe zhvillimin e teknologjisë financiare në nivel lokal, rajonal dhe ndërkombëtar.

Rezultatet e të nxënit

Me përfundimin me sukses të programit BSc në Kompjuterikë dhe FinTech, studentët do të jenë në gjendje të demonstrojnë njohuritë, shkathtësitë dhe kompetencat e mëposhtme:

Njohuri:

• Demonstrojnë njohuri të thella në programim, algoritme dhe struktura të të dhënave për zgjidhjen e problemeve teknologjike në fushën e financës dhe teknologjive financiare.
• Identifikojnë rolin dhe ndikimin e teknologjive moderne si Blockchain, Cloud Computing, Inteligjenca Artificiale dhe Big Data në zhvillimin dhe inovacionin financiar.
• Përshkruajnë mekanizmat e sigurisë kibernetike, kriptografisë dhe kornizave rregullatore për mbrojtjen e të dhënave financiare digjitale.
• Analizojnë konceptet themelore të financës, kontabilitetit, tregjeve financiare dhe funksionimit të institucioneve bankare dhe kompanive FinTech.
• Vlerësojnë ndikimin ekonomik, etik dhe social të financave digjitale dhe transformimit teknologjik në sektorin financiar.
• Klasifikojnë modelet e zhvillimit të produkteve dhe shërbimeve FinTech sipas qëndrueshmërisë, inovacionit dhe integrimit me tregjet globale.

Shkathtësi:

• Përdorin të menduarit kritik për analizimin, krahasimin dhe vlerësimin e të dhënave financiare dhe zgjidhjeve teknologjike në aplikacionet FinTech.
• Krijojnë dhe zhvillojnë zgjidhje digjitale inovative në financë duke aplikuar teknologji si Cloud Computing, Inteligjencë Artificiale dhe Blockchain.
• Menaxhojnë procese dhe platforma digjitale në banka dhe kompani sigurimesh, duke kontribuar në përmirësimin e efikasitetit operacional dhe përvojës së klientit.
• Analizojnë dhe vlerësojnë strategjitë e menaxhimit të investimeve dhe portofolit në tregjet e kriptomonedhave duke përdorur analiza të avancuara dhe tregues financiarë.

Kompetenca:

• Punojnë në mënyrë të pavarur dhe bashkëpunuese në zhvillimin dhe implementimin e zgjidhjeve inovative FinTech.
• Menaxhojnë projekte dhe procese financiare digjitale me përgjegjësi profesionale, teknike dhe etike.
• Koordinojnë dhe udhëheqin menaxhimin e rreziqeve operacionale dhe të sigurisë në sistemet bankare dhe të sigurimeve në përputhje me standardet ndërkombëtare.
• Udhëheqin projekte kërkimore dhe inovative në fushën e Blockchain, kriptovalutave dhe teknologjive të reja financiare.

Niveli dhe grada akademike

Me përfundimin e suksesshëm të studimeve në programin BSc Kompjuterikë dhe FinTech, studentët fitojnë thirrjen akademike “Bachelor i Shkencave në Kompjuterikë dhe FinTech”.

Numri i vendeve për studim

Numri i vendeve të përcaktuara për studim në programin BSc Kompjuterikë dhe FinTech, sipas vendimit të AKA-së, është 130 studentë për vit akademik.

Tё drejtat e studentëve

Kohëzgjatja dhe numri i ECTS-ve

Studimet në programin BSc Kompjuterikë dhe FinTech zgjasin 3 vite akademike, përfshijnë gjithsej 180 ECTS dhe organizohen në 6 semestra studimi.

Format dhe metodat e mësimdhënies

Programi BSc në Kompjuterikë dhe FinTech bazohet në një qasje moderne didaktike që vendos studentin në qendër të procesit mësimor dhe integron njohuritë teorike me përvojën praktike. Procesi i mësimdhënies realizohet përmes metodave interaktive që nxisin pjesëmarrjen aktive të studentëve, duke përfshirë punën në grup, diskutimet tematike, detyrat praktike, ushtrimet laboratorike dhe projektet kërkimore.

Kjo qasje mbështet zhvillimin e të menduarit kritik, kreativitetit dhe aftësisë për aplikimin e njohurive në situata reale në fushën e teknologjisë, financës dhe zgjidhjeve inovative FinTech. Përmes kombinimit të teorisë dhe praktikës, studentët zhvillojnë kompetenca profesionale të nevojshme për tregun bashkëkohor të punës.

Format e vlerësimit

Çdo lëndë në programin BSc në Kompjuterikë dhe FinTech mbështetet nga një syllabus individual, i cili përcakton rezultatet e të nxënit, përmbajtjen javore, format e mësimdhënies, metodat e vlerësimit dhe literaturën e rekomanduar. Vlerësimi i studentëve realizohet përmes kombinimit të vlerësimit formativ dhe përmbledhës, duke siguruar transparencë, drejtësi dhe monitorim të vazhdueshëm të progresit akademik.

Vlerësimi formativ zhvillohet gjatë semestrit përmes kuizeve, detyrave, aktiviteteve në klasë, ushtrimeve laboratorike, pjesëmarrjes aktive në diskutime dhe punës në grup, duke mbështetur zhvillimin gradual të njohurive dhe aftësive praktike të studentëve.

Vlerësimi përmbledhës realizohet në fund të semestrit dhe përfshin provime, prezantime, punime seminarike dhe projekte praktike. Në lëndët profesionale dhe praktike, theks i veçantë i kushtohet projekteve ku studentët zhvillojnë zgjidhje digjitale, aplikacione dhe sisteme inovative në fushën e FinTech.

Studimet përmbyllen me temën e diplomës Bachelor, ku studentët realizojnë një projekt të pavarur kërkimor ose aplikativ që integron njohuritë, aftësitë dhe kompetencat e fituara gjatë gjithë programit të studimit.