Administratë Publike

Qëllimi dhe Profili i Programit

Fakulteti i Administratës Publike është një qendër kryesore e dijes dhe zhvillimit në fushën e administratës publike në Kosovë dhe në rajon. Rrjedhimisht programi MA në Administratë Publike ofron një mjedis ndërdisiplinor ku studentët përfitojnë njohuri të thella për administrimin publik përmes kërkimit shkencor, bashkëpunimit me institucionet qendrore dhe lokale, me bizneset vendore, si dhe përmes aplikimit të dijes në praktikë, ligjërata profesionale, këshillim dhe trajnime.

Programi MA në Administratë Publike ndërthur teorinë me praktikën, duke i pajisur studentët me njohuri të avancuara për administratën dhe menaxhimin publik. Programi synon të zhvillojë aftësitë analitike, mendimin strategjik dhe kompetencat profesionale të nevojshme për t’u përballur me sfidat e sektorit publik. Përmes qasjes së tij moderne dhe të qasshme, programi përgatit studentët të kontribuojnë në mënyrë aktive në zhvillimin dhe funksionimin e institucioneve publike në një sistem që vazhdimisht evoluon në Kosovë.

Misioni

Misioni i programit MA Administratë Publike është: “të pajisë studentët me njohuri të thelluara akademike, aftësi kërkimore dhe kompetenca kyçe në fushën e studimeve të administratës publike, përmes metodave bashkëkohore të mësimdhënies dhe përvojave kërkimore që u mundësojnë atyre të kontribuojnë në shoqëri duke i shfrytëzuar këto aftësi në tregun e punës dhe në arsimimin e tyre të mëtejshëm.”

Bartësit e programit tё studimit

• Dr. Sc. Besard Belegu
• Dr. Sc. Lavdim Terziu

Rezultatet e tё nxёnit

Pas përfundimit me sukses të programit tё studimit, studenti do të fitoj këto njohuri, shkathtësi dhe kompetenca:

Njohuri:

• përkufizojnë, përshkruajnë dhe demonstrojnë njohuri mbi teoritë e Administratës Publike;
• përshkruajnë dhe identifikojnë parimet, standardet, praktikat dhe modelet kryesore të Administratës Publike;
• njohin dhe identifikojnë institucionet administrative vendore dhe ndërkombëtare: rolin, funksionin dhe rëndësinë e tyre;
• analizojnë, krahasojnë dhe vlerësojnë zhvillimin e fenomeneve në fushën e Administratës Publike;
• bëjnë sinteza të fenomeneve, problemeve, çështjeve dhe teorive në fushën e Administratës Publike për tema të caktuara të trajtuara gjatë studimeve;
• demonstrojnë mendim të lirë dhe aftësi për të ofruar zgjidhje të qëndrueshme në drejtim të harmonizimit të parimeve, objektivave dhe strategjive shtetërore në fushën e administratës publike;
• të jenë të qëndrueshëm në progresin shkencor dhe të zhvillojnë ambicie për kërkim shkencor;
• kryejnë në mënyrë të pavarur punën profesionale në Administratën Publike brenda institucioneve shtetërore;
• vazhdojnë studimet doktorale ose të punojnë në institucione të kërkimit shkencor në fushën e Administratës Publike.

Shkathtësi:

• aftësi të larta për të analizuar çështjet bashkëkohore të administratës dhe aftësi për të reflektuar në mënyrë kritike mbi praktikën e tyre profesionale;
• aftësi të avancuara për të kombinuar shkathtësitë profesionale si vendimmarrja, menaxhimi, etika, menaxhimi i projekteve, menaxhimi strategjik, lidershipi dhe negociimi me njohuritë e bazuara në juridik dhe ekonomi;
• të zhvillojnë aftësi ndërpersonale dhe komunikimi për një gamë aktivitetesh profesionale, përfshirë hartimin e raporteve, diskutimet në vendin e punës, negociatat dhe menaxhimin;
• aftësi për të punuar me të tjerët dhe për të udhëhequr në mjedise sfiduese.

Kompetenca:

• të jenë të pavarur, të aftë për të punuar në grupe të ndryshme dhe për të vlerësuar perspektiva alternative;
• të veprojnë me një ndjenjë të lartë integriteti personal dhe profesional dhe të inkurajojnë të tjerët të veprojnë njësoj;
• të demonstrojnë aftësi sasiore, teknologjike dhe analitike për zgjidhjen e problemeve;
• të zbatojnë parimet e menaxhimit efektiv të sektorit publik;
• të dizajnojnë projekte kërkimore sasiore dhe cilësore, të analizojnë të dhënat dhe të nxjerrin përfundime;
• të shpjegojnë dhe zbatojnë modele të ndryshme të vendimmarrjes;
• të analizojnë dhe shpjegojnë se si teori të ndryshme të menaxhimit publik dhe organizatave përcaktojnë dhe synojnë të realizojnë vlerat demokratike dhe kushtetuese;
• të reflektojnë në mënyrë kritike mbi natyrën dhe pasojat e diversitetit, një diversitet që ndryshon vazhdimisht në një botë të karakterizuar nga ndërveprimi global.

Pranimi nё studime

Sipas nenit 6 të Rregullores, studimet Master kanë të drejtë t’i regjistrojnë të gjithë ata kandidatë të cilët i kanë përfunduar studimet themelore Bachelor dhe që kanë fituar së paku 180 ECTS, përkatësish 240 ECTS. Tutje, kushtet për pranim në studimet Master janë:

• të kenë mbaruar nivelin Bachelor të studimeve në një institucion të akredituar dhe të njohur të arsimit të lartë në vend ose jashtë vendit;
• të kryejnë me sukses procedurën përzgjedhëse;
• kompletimi me sukses i procedurës përzgjedhëse;
• kompletimi i dosjes me dokumentacionin formal ashtu siç përcaktohet nga MASHT.

Në rast se studimet paraprake studenti i ka kryer në ndonjë fushë tjetër, studenti obligohet t’i nënshtrohet provimeve themelore të programit bachelor Administratë Publike të cilat quhen provime diferenciale.

Numri i vendeve për studim

Numri i vendeve për studim sipas vendimit të AKA-së është 120 studentë për vit akademik.

Njohja e kualifikimeve

Në bazë të Rregullores për Studime Master të Kolegjit AAB, njohja e kualifikimeve dhe transferi i studimeve rregullohen nga Nenet 9, 10 dhe 11 të kësaj rregulloreje.

Këto nene përcaktojnë kushtet, kriteret dhe procedurat për pranimin e studentëve nga institucione të tjera të arsimit të lartë, mënyrën e realizimit të transferimit, si dhe procesin e njohjes dhe barazvlerësimit të lëndëve të studiuara më parë.

Kohëzgjatja dhe numri i ECTS-ve

Studimet në programin MA Administratë Publike zgjasin 2 vite, 120 ECTS me gjithsej 4 semestra.

Niveli dhe Grada Akademike

Me rastin e përfundimit të studimeve, studentët fitojnë thirrjen akademike Master i Arteve në Administratë Publike.

Perspektivat e punësimit tё studentëve

Të diplomuarit e programit MA në Administratë Publike kanë mundësi të gjera punësimi në institucione publike, agjenci qeveritare, administratën qendrore dhe lokale, si dhe në organizata ndërkombëtare dhe sektorin privat.

Ata mund të angazhohen në pozita të politikëbërjes, analizës së politikave publike, menaxhimit të projekteve, hartimit dhe implementimit të strategjive institucionale, si dhe në drejtimin e proceseve administrative dhe organizative. Falë aftësive kërkimore të fituara gjatë studimeve, të diplomuarit mund të kontribuojnë si hulumtues në institute, qendra kërkimore, organizata të shoqërisë civile dhe projekte të analizës së politikave.

Programi gjithashtu ofron një bazë solide akademike që u mundëson studentëve të vazhdojnë studimet e tyre në nivelin PhD në fushën e administratës publike, shkencave politike, menaxhimit publik ose fusha të tjera të ndërlidhura, duke ndërtuar një karrierë akademike ose kërkimore.

Metodat e vlerësimit

Vlerësimi i arritjeve të studentëve realizohet në përputhje me rezultatet e të nxënit të lëndëve dhe aftësitë akademike/profesionale që kërkon programi. Format e vlerësimit përcaktohen në secilin syllabus dhe studentët informohen qartë për detyrat dhe angazhimet gjatë semestrit.

Qasja institucionale nxit përdorimin e metodave të ndryshme të vlerësimit, të përshtatura për fushën e administratës publike. Vlerësimi përfshin kombinimin e vlerësimit formativ dhe atij sumativ, përmes:

• Vlerësimit të vazhdueshëm, që shqyrton pjesëmarrjen, detyrat dhe aktivitetet gjatë gjithë semestrit;
• Testeve ndërmjetëse të cilat mund të jenë ese, teste, hulumtime, prezantime apo diskutime;
• Provimi përfundimtar, i cili zhvillohet me shkrim dhe mund të përfshijë test me pyetje të kombinuara apo ese.

Tё dhënat pёr kalueshmërinë, braktisjen e studimeve dhe punësimin

BRAKTISJA E STUDIMEVE <14%

PUNËSUESHMËRIA E STUDENTËVE >90%

SUKSESI I STUDENTËVE NË PROVIME 9.0

Tё drejtat e studentëve

Studentët e Kolegjit AAB, bazuar në Statutin dhe Rregulloren e Studimeve MA, gëzojnë të drejtën të marrin pjesë në ligjërata dhe aktivitete akademike, të përdorin shërbimet universitare si biblioteka dhe interneti, të përfaqësohen në organet e studentëve, të organizohen në shoqata jo-politike, të pajisen me dokumente zyrtare studentore dhe, pas përfundimit të studimeve, të marrin diplomën përkatëse. Studentët kanë të drejtë të paraqesin ankesa dhe kërkesa lidhur me çdo aspekt të procesit mësimor, vlerësimit apo çdo çështje tjetër që konsiderojnë se u pengon zhvillimin e tyre akademik dhe mirëqenien gjatë studimeve në kolegj.

Pjesëmarrja e studentëve nё proceset e sigurimit tё cilësisë

Në Kolegjin AAB, studenti është akter i barabartë i cili përfshihet në hartimin, zbatimin dhe vlerësimin e proceseve të sigurimit të cilësisë. Studentët janë pjesëmarrës aktiv në çdo grup punues apo punëtori në të cilën diskutohet politik bërja, planifikimi strategjik dhe vendimmarrja. Në veçanti, studenti merr pjesë në procedurat e sigurimit të cilësisë përmes:

• vlerësimit të stafit akademik dhe përmbajtjeve mësimore;
• vlerësimit të shërbimeve administrative dhe infrastrukturës;
• anëtarësisë së plotë në trupat akademike dhe vendimmarrëse të institucionit;
• pjesëmarrjes në komisione dhe grupe punuese;
• përfshirjes në procesin e hartimit, plotësimit dhe rishikimit të programeve të studimit;
• dhënies së inputeve të vazhdueshme për çdo fushë e cila i përket studentit dhe kolegjit;
• dhënies së rekomandimeve për përmirësim për secilën procedurë, politikë, proces apo vendim i cili lidhet me kolegjin.