Misioni i programit të studimit BA Menaxhment është të përgatisë studentët me aftësi konkurruese menaxheriale për tregun e punës në Kosovë, rajon dhe më gjerë. Programi synon që përmes metodave bashkëkohore të mësimdhënies të zhvillojë njohuritë dhe aftësitë e studentëve për menaxhim, udhëheqje dhe vendimmarrje inovative të bazuara në hulumtime faktike të cilat ofrojnë zgjidhje kreative për komunitetin, zhvillimin ekonomik dhe shoqërinë në përgjithësi.
Në këtë drejtim, mënyra e organizimit të programit të studimit është e tillë që i ofron studentëve ligjërata dhe ushtrime brenda institucionit si dhe në të njëjtën kohë praktikë profesionale në industri. Përgjithësisht, programi është hartuar në atë mënyrë që përmban disa lëndë kryesore që janë të profesionit, lëndë të përgjithshme që përfshijnë fushën e menaxhmentit, lëndë në fushën e biznesit dhe lëndë në fushën e ekonomisë, pastaj disa lëndë zgjedhore, të cilat i ndihmojnë studentit që të zgjedhë lëndë sipas interesimit të tij për fusha të ndryshme ekonomike dhe trendëve të reja të digjitalizimit.
Pas përfundimit të programit BA Menaxhment, studentët do të fitojnë njohuri të thelluara mbi parimet dhe praktikat e menaxhmentit dhe marketingut në mjedise të ndryshme, duke përfshirë menaxhimin e furnizimit zinxhiror, mjedisit dhe burimeve njerëzore. Ata do të jenë në gjendje të analizojnë teoritë ekonomike dhe t’i zbatojnë ato në vendimmarrje, menaxhimin e rreziqeve dhe zhvillimin e strategjive biznesore.
Gjithashtu, do të zotërojnë përdorimin e metodave statistikore dhe matematikore për analizë ekonomike dhe menaxheriale, si dhe do të kuptojnë standardet ndërkombëtare të kontabilitetit financiar dhe menaxherial, duke u aftësuar në menaxhimin financiar dhe të investimeve. Studentët do të zhvillojnë shkathtësi për të analizuar dhe zgjidhur probleme operacionale dhe strategjike, duke përdorur teknologjinë dhe platforma digjitale për menaxhimin e biznesit.
Ata do të aftësohen në analizën e të dhënave dhe përdorimin e softuerëve të specializuar, si dhe në komunikimin profesional në gjuhën amtare dhe të huaj për përgatitjen e raporteve, planeve strategjike dhe projekteve. Përmes procesit akademik, studentët do të jenë në gjendje të hartojnë projekte kërkimore dhe tema diplome duke respektuar standardet shkencore dhe etike.
Ata do të jenë të aftë të punojnë në ekip me kreativitet dhe përgjegjësi, të zbatojnë njohuritë e tyre në praktikë dhe të zhvillojnë pavarësinë e nevojshme për studime të mëtejshme dhe vetë-studim.
Me rastin e përfundimit të studimeve, kandidati fiton thirrjen Bachelor i Arteve në Menaxhment.
Studimet në Programin Menaxhment dhe Informatikë zgjasin 3 vite, 180 ECTS me gjithsej 6 semestra. Secili semestër duhet të plotësojë kuotën e 30 ECTS. Të gjitha këto drejtime krijojnë mundësi të vazhdimit të studimeve në nivelin Master, që është 2 vjeçar apo 120 ECTS.
Lënda Mikroekonomia I ka për qëllim t’i pajisë studentët me bazat e teorisë mikroekonomike, si degë e ekonomiksit. Fokusi do të jetë mbi zgjedhjet dhe vendimet të cilat i marrin individët dhe ndërmarrjet në kushte të resurseve të kufizuara. Vëmendje e veçantë do t’i kushtohet tregut dhe aspekteve të lidhura me të, përcaktimin e çmimeve, dhe alokimit të resurseve.
Qëllimi kryesor i kursit “Matematikë për Ekonomi dhe Biznes” është të aftësojë studentët në zhvillimin e mendimit kritik dhe logjikë për zgjidhjen e problemeve të ndryshme matematikore dhe marrjen e vendimeve në nivel makroekonomik dhe mikroekonomik përmes përdorimit të modeleve matematikore dhe teknikave të specializuara.
Qëllimi kryesor i kursit “Gjuhë Angleze 1” është të zhvillojë aftësitë e studentëve në të folurit dhe të shkruarin në Gjuhën Angleze në fushën e ekonomisë, gjegjësisht biznesit. Poashtu, u mundëson studentëve që të zhvillojnë të menduarit kritik dhe logjik në formulimin e fjalive në mënyrë të drejtë duke përdorur terminologjinë nga fusha e ekonomisë.
Qëllimi i përgjithshëm i lëndës është që studentët të përvetësojnë shkathtësitë që ofron TIK në zgjidhjen e problemeve të ndryshme me anë të përdorimit të kompjuterit. Në këtë seri, do të prezantohen disa Office Programe, të cilat do të mësojnë se si t’i përdorni në kombinim me njëra-tjetrën.
Pjesëmarrësit do të njihen me shkathtësitë themelore të cilat do t’i përdorin për realizimin e obligimeve të përditshme dhe atë, prej përfitimit të njohurive elementare në Windows deri te krijimi i prezantimit në PowerPoint, detyra themelore dhe të avancuara në Excel dhe njohja me Databazën në Access.
Qëllimi kryesor i lëndës “Kontabilisti në Biznes” është të aftësojë studentët që të krijojnë një pasqyrë mbi strukturën, organizimin dhe kulturën organizative në biznes si dhe të demonstrojnë kontabilitetin dhe funksionet financiare brenda biznesit.
Lënda “Etika në Biznes” ka për qëllim t’i pajisë studentët me njohuri dhe aftësi për të kuptuar dhe analizuar etikën si një komponent thelbësor të biznesit, menaxhimit dhe marrëdhënieve profesionale. Nëpërmjet kësaj lënde, studentët do të zhvillojnë aftësinë për të reflektuar mbi arsyetimin etik në vendimmarrjen biznesore dhe për të vlerësuar ndikimin e etikës në suksesin e organizatave.
Lënda Makroekonomia ka për qëllim t’i pajisë studentët me njohuri bazike mbi teoritë, konceptet dhe praktikat makroekonomike, duke krijuar, zhvilluar dhe avancuar dijen e studentëve në lëminë e makroekonomisë si një bazë që mundëson funksionimin e një ekonomie vendore si një nën-sistem i sistemit global ekonomik.
Qëllimi kryesor i kursit “Statistikë për Ekonomi dhe Biznes” është të aftësojë studentët për njohuritë teorike, konceptuale dhe analitike për zgjidhjen e problemeve konkrete të fushës ekonomike dhe interpretimin e fenomeneve ekonomike për të cilat nevojitet zbatimi i statistikës dhe instrumenteve statistikore.
Ky kurs synon t’u ofrojë studentëve njohuritë e nevojshme themelore në lidhje me kontabilitetin dhe rolin e tij në sistemin e menaxhimit të njësive ekonomike, me konceptet dhe parimet themelore të përdorura për ndërtimin e sistemit të kontabilitetit për të siguruar informacion të besueshëm dhe cilësor përmes pasqyrave financiare.
Qëllimi kryesor i këtij kursi është që t’u japë studentëve dije teorike të shoqëruar me shembuj praktikë, për të identifikuar strategjitë dhe specifikat e mesazheve komunikuese të bizneseve në epokën e shumësisë së mediave dhe mediatizimit të shoqërisë. Një qëllim tjetër është që t’i aftësojë studentët të përdorin burimet shkencore në hartimin e një eseje studentore.
E drejta biznesore është një lëndë e rëndësishme për zhvillimin intelektual dhe profesional të studentëve, sidomos të atyre që në të ardhmen do të jenë të angazhuar në fushën e biznesit. Tani më shumë se kurrë, kjo lëndë ka një rëndësi të veçantë sepse Kosova është duke kaluar nëpër një transformim juridik dhe ekonomik. Për atë arsye, kjo lëndë do t’i përgatisë studentët që t’i mësojnë rregullat ligjore të aplikueshme në Kosovë dhe në nivel ndërkombëtar. Të gjitha ato do t’ju mundësojnë studentëve një funksionim adekuat në një ambient juridik evolues.
Lënda Historia e Mendimit Ekonomik ka për qëllim përvetësimin e njohurive të përgjithshme mbi historinë e zhvillimit ekonomik të kombeve, duke analizuar periudha të ndryshme të tranzicionit politik, social dhe ekonomik. Në mënyrë specifike, kjo lëndë synon të aftësojë studentët në njohjen e konceptit të ekonomisë dhe resurseve të saj në përgjithësi, t’i njoftojë ata me teoritë kryesore të mendimit dhe historisë ekonomike, si dhe t’i përgatisë për të kuptuar dhe zbatuar këto teori në kontekstin e ekonomisë moderne.
Qëllimi kryesor i kursit “Gjuhë Angleze 2” është të përvetësojë aftësitë e studentëve në të folurit dhe të shkruarit në gjuhën angleze në fushën e ekonomisë, gjegjësisht biznesit. Poashtu, u mundëson studentëve që të zhvillojnë të menduarit kritik dhe logjik në formulimin e fjalive në mënyrë të drejtë duke përdorur terminologjinë nga fusha e ekonomisë.
Lënda Menaxhment ka për qëllim paisjen e studentëve me njohuri teorike dhe shkathtësi praktike, të cilat do t’u mundësojnë atyre ndërtimin e kompetencave bashkëkohore profesionale, individuale dhe ekipore në funksion të menaxhimit të pavarur të bizneseve të ndryshme.
Kjo lëndë ua mundëson studentëve njohjen me procesin e vendimmarrjes dhe në të njëjtën kohë me menaxhimin e riskut. Gjithashtu, kjo lëndë synon përgatitjen e menaxherëve të ardhshëm në përballimin e presionit dhe kufizimeve të ndryshme gjatë procesit të vendimmarrjes.
Lënda “Menaxhmenti Financiar” ka për qëllim t’u ofrojë studentëve njohuri që të zhvillojnë njohuritë dhe aftësitë e pritura nga një menaxher financiar, në lidhje me çështjet që ndikojnë në investimet, financimet dhe vendimet e politikës së dividendit.
Lënda Marketingu ka për qëllim përvetësimin e njohurive teorike dhe shkathtësive praktike të studentëve, të cilat do të mundësojnë ndërtimin e kompetencave në fushën e marketingut. Kjo përfshin analizën e specifikave të sektorit të prodhimit, tregtimit dhe shërbimeve, dhe përpunimin e rasteve specifike që lidhen me konceptin e tregtimit (marketing).
Lënda Ekonomiksi Menaxherial synon t’u ofrojë studentëve mjete analitike dhe arsyetim ekonomik për marrjen e vendimeve menaxheriale. Përfshin analizën e kërkesës, strukturat e kostos, strategjitë e çmimeve, konkurrencën në treg dhe analizën e rrezikut. Studentët mësojnë të zbatojnë parimet mikroekonomike për zgjidhjen e problemeve reale të biznesit.
Qëllimi i lëndës është që të përvetësojë njohuritë e studentëve për integrimin ekonomik evropian dhe perspektivën e Kosovës në këtë fushë, në të cilën përfshihen njohuritë historike të Bashkimit Evropian, institucionet e Bashkimit Evropian, kriteret e anëtarësimit, etj.
Lënda “Kontabiliteti Financiar” ka për qëllim t’u ofrojë studentëve njohuri dhe kuptim të parimeve themelore dhe koncepteve në lidhje me kontabilitetin financiar dhe aftësinë teknike në përdorimin e teknikave të kontabilitetit me hyrje të dyfishtë, përfshirë përgatitjen e pasqyrave financiare.
Qëllimi i përgjithshëm i lëndës është që studentët të përvetësojnë njohuritë dhe shkathtësitë që ofrojnë Sistemet e Informacionit dhe të Komunikimit në zgjidhjen e problemeve të ndryshme me anë të përdorimit të këtyre sistemeve. Studentëve do t’u mundësohet të ndërtojnë kompetenca të cilat do t’i përdorin për realizimin e obligimeve të përditshme dhe atë, prej përfitimit të njohurive elementare për Sistemet Informative e deri te aplikimi praktik i tyre në fushën e menaxhmentit, ekonomisë dhe biznesit.
Qëllimi i lëndës Ndërmarrësi dhe Menaxhim i NVM-ve është të ngritë njohuritë bazike të studentëve për funksionimin dhe veprimtarinë e ndërmarrjeve të vogla dhe të mesme si dhe rolin e ndërmarrësve në suksesin e tyre, e që u mundësojnë atyre të ndërtojnë kompetenca që në mënyrë të pavarur të jenë në gjendje të krijojnë ide funksionale për biznes.
Lënda Lidershipi ka për qëllim t’u sigurojë studentëve njohuritë themelore të lidershipit dhe ndikimin e tij në sjelljen organizative dhe individët, duke analizuar teoritë kryesore mbi lidershipin, faktorët e brendshëm dhe të jashtëm që ndikojnë në procesin e udhëheqjes.
Qëllimi i lëndës Biznesi Ndërkombëtar është të pajisë studentët me njohuri teorike dhe praktike për zhvillimin e bizneseve në tregun global. Studentët mësojnë të analizojnë mundësi rritjeje, të hartojnë plane biznesi dhe të përdorin teknologjinë për të krijuar avantazhe konkurruese në një kontekst ndërkombëtar.
Lënda synon t’u ofrojë studentëve njohuri mbi parimet dhe sfidat e globalizimit dhe ndikimin e tij në bizneset globale. Studentët zhvillojnë kuptim mbi trendet globale, rolin e aktorëve ndërkombëtarë dhe biznesit ndërkombëtar, përballen me sfida dhe mundësi, dhe inkurajohen të aplikojnë dijet në praktikë përmes rasteve studimore.
Lënda Financa Publike ka për qëllim përvetësimin e njohurive teorike dhe bazike në fushën e financave publike, buxhetit të shtetit, definimin, karakteristikat dhe llojet e të hyrave fiskale dhe jofiskale, të aplikueshme në një shtet historikisht dhe aktualisht.
Lënda “Menaxhimi Mjedisor” u mundëson studentëve të marrin njohuri të përgjithshme lidhur me Sistemet e Menaxhimit Mjedisor. Lënda në fjalë krijon ide për prezantimin dhe zbatimin e politikave mjedisore, planifikimin, funksionimin dhe kontrollin e çështjeve të nxehta si ngrohja globale, ndotja, shpyllëzimi, erozioni i tokës, deponitë ose shterimi i burimeve natyrore të Tokës. Menaxhimi i Mjedisit mbulon tema të tilla si menaxhimi i burimeve, gjeografia, shkenca mjedisore dhe më shumë.
Qëllimi i lëndës “Menaxhimi i Operacioneve” është të pajisë studentët me njohuri mbi parimet dhe praktikat e menaxhimit të operacioneve në biznese prodhuese dhe shërbyese. Studentët mësojnë rolin e menaxherit operacional, analizojnë raste praktike dhe zhvillojnë aftësi për të marrë vendime të pavarura në menaxhimin e operacioneve.
Qëllimi kryesor i lëndës është të prezantojë rëndësinë e informacionit kontabël si mjet vendimmarrës për menaxhmentin. Studentët pajisen me njohuri mbi analizën e kostove, buxhetimin dhe kontrollin e resurseve, si dhe inkurajohen të përdorin teknika statistikore për të mbështetur vendimmarrjen në biznes.
Kjo lëndë ua mundëson studentëve njohjen me problematikën e ndërlikuar të menaxhimit me resurset njerëzore, i kuptuar si proces i realizimit të disa aktiviteteve dhe funksioneve. Lënda synon përgatitjen për shfrytëzim sa më efikas të burimeve njerëzore si resurset më të rëndësishme në një organizatë. Natyrisht, duke qenë një materie e ndërlikuar për shkak të marrjes me resurse humane, kursi fokusohet edhe në referenca etike lidhur me këtë pjesë të rëndësishme të menaxhimit.
Qëllimi kryesor i lëndës është t’i informojë studentët me aspekte praktike të ambientit dinamik dhe të ndryshueshëm të punës dhe aftësimin me shkathtësi të buta për ndërlidhjen direkte me punëdhënësit.
Lënda “E-Biznesi” ka për qëllim studimin e ndikimit të teknologjisë digjitale në strategjitë e biznesit duke u bazuar në kërkesat e tregut kombëtar, rajonal dhe global. Kursi i lëndës bazohet në kalimin e sistemit klasik të të bërit biznes në sistemin digjital duke u bazuar në trendët globale, duke bërë që sipërmarrësit të kenë më lehtë qasjen në tregun global nëpërmjet sistemit të teknologjisë.
Lënda “Inteligjenca Artificiale në Biznes” synon të pajisë studentët me njohuri bazë mbi ndërtimin, funksionimin dhe zbatimin e inteligjencës artificiale në mjedisin e biznesit. Studentët mësojnë konceptet themelore të IA-së, mënyrën e ndërveprimit të saj me sisteme të tjera dhe aplikimin e saj në vendimmarrje biznesore.
Qëllimi i lëndës “Menaxhimi i Furnizimit Zinxhiror” është që të zhvillojë njohuritë tek studentët për rëndësinë e furnizimit me kohë të biznesit dhe konsumatorit me të mira, si dhe menaxhimin e zinxhirit të ekonomisë globale në përgjithësi, duke stimuluar të menduarin kritik mbi temat e arsyetimit ekonomik, negociatat e biznesit dhe përdorimin e njohurive dhe shkathtësive në praktikë.
Kursi është hartuar për të ndihmuar studentët të zhvillojnë aftësitë e tyre kërkimore dhe komunikuese, ndërsa ofron një hartë rrugore për karrierën e tyre të ardhshme në marketing ose biznes ndërkombëtar. Ky kurs do t’u sigurojë studentëve një pasqyrë të mundësive të karrierës në marketing dhe biznes ndërkombëtar.
Qëllimi i përgjithshëm është krijimi i aftësive (dijeve dhe shkathtësive) për të planifikuar, vlerësuar dhe menaxhuar realizimin e projekteve në mënyrë efektive sipas metodologjive të ndryshme dhe standardeve ndërkombëtare.
Qëllimi i lëndës “Menaxhimi Strategjik” është që studentët të marrin njohuri nga fusha e Menaxhimit Strategjik dhe këto njohuri dhe shkathtësi të fituara t’i aplikojnë në të ardhmen në vendin e punës ku do të punojnë dhe në shoqëri në përgjithësi.
Lënda synon t’u mundësojë studentëve të mbulojnë metodologjinë e punës kërkimore dhe terminologjinë përkatëse; përcaktimi dhe zhvillimi i hapave të përgjithshëm për të shkruar një punim kërkimor shkencor, që nga përcaktimi i temave kërkimore, përgatitja e një projekti kërkimor, rishikimi i literaturës, përcaktimi i dizajnit të kërkimit, popullatës dhe kampionit përkatës, përzgjedhja dhe përcaktimi i instrumenteve matëse dhe mbledhja e të dhënave, analizimi dhe interpretimi i të dhënave, hartimi i një raporti kërkimor, madje edhe vlerësimi i këtij raporti, shoqërohen me detyra praktike që zhvillohen paralelisht me përgatitjen akademike të studentëve.
Qëllimi kryesor i këtij kursi është të sigurojë mësim të avancuar mbi dijen dhe inovacionin në përgjithësi, mënyrën e inovacionit, faktorët e rëndësishëm dhe pasojat ekonomike dhe sociale. Fokusi kryesor i këtij kursi janë praktikat dhe proceset e përdorura nga sipërmarrësit dhe menaxherët për të menaxhuar në mënyrë efektive inovacionin, qoftë në organizatat në zhvillim apo ato ekzistuese. Ky kurs do të ofrojë kryesisht njohuri bazë për kryerjen e teorive që lidhen me inovacionin në një kontekst specifik dhe fazat e tij.
Qëllimi kryesor i lëndës “Sjellje Organizative” është të aftësojë studentët në zhvillimin e mendimit kritik dhe logjik për zgjidhjen e problemeve të ndryshme në organizatë dhe marrjen e vendimeve në nivel të menaxhimit të situatave përmes përdorimit të modeleve, metodave dhe shembujve konkretë nga ligjëratat dhe ushtrimet e lëndës.
Qëllimi kryesor i kursit është që t’i njoftojë studentët dhe t’u japë njohuritë bazike në lidhje me kërkesat ligjore që kanë të bëjnë me tatimet dhe aspektet komerciale të ndërmarrjeve në Kosovë. Gjithashtu, ky syllabus synon t’u japë njohuri studentëve mbi parimet dhe fushat teknike të tatimeve dhe ligjeve komerciale, pasi që ato ndikojnë në aktivitetet e individëve dhe bizneseve në Kosovë.
Lënda “Informacioni dhe Ekonomia Dixhitale” ka për qëllim t’i pajisë studentët me njohuri mbi ndikimin e informacionit dhe dixhitalizimit në biznes dhe tregje. Studentët mësojnë konceptet dhe trendet kryesore të ekonomisë dixhitale, analizojnë raste praktike dhe aftësohen në përzgjedhjen e teknologjive për menaxhimin e bizneseve dixhitale.
Qëllimi i përgjithshëm i lëndës është t’u mundësojë studentëve që të njohin strukturën, funksionet, operacionet dhe rolin e institucioneve financiare si bankat dhe institucionet financiare jobankare (fondet pensionale, kompanitë e sigurimit dhe fondet investive) në kuadër të sistemit të përgjithshëm financiar dhe ekonomik.
