POLICIA E KOSOVËS DHE AAB: BASHKËPUNIM PËR TEKNOLOGJI DHE SIGURI KIBERNETIKE

Prishtinë, 26 shtator 2025 –  Policia e Kosovës bashkë me Kolegji AAB dhe RIT Kosovo (A.U.K) kanë nënshkruar një marrëveshje bashkëpunimi strategjik me synim fuqizimin e kapaciteteve profesionale dhe akademike në fushën e teknologjisë informative, inteligjencës artificiale dhe sigurisë kibernetike.

Marrëveshja u nënshkrua nga Kolonel Gazmend Hoxha, Drejtor i Përgjithshëm i Policisë së Kosovës, dhe Dr.sc. Blerim Olluri, Rektor i Kolegjit AAB, në një ceremoni solemne të mbajtur në Prishtinë.

Ky partneritet synon jo vetëm ngritjen e cilësisë së shërbimeve publike, por edhe krijimin e mundësive konkrete për studentët dhe stafin akademik që të angazhohen në projekte me ndikim të drejtpërdrejtë në sigurinë publike dhe zhvillimin teknologjik të vendit.

Qëllimet dhe fushat e bashkëpunimit

Në kuadër të marrëveshjes, Policia e Kosovës dhe Kolegji AAB do të bashkëpunojnë në këto fusha:

• Praktika profesionale për studentët në ambientet e Policisë së Kosovës, duke u ofruar përvojë reale dhe praktike.
• Organizim vizitash studimore dhe ushtrimesh të përbashkëta për reagim ndaj incidenteve dhe skenarëve të sigurisë.
• Zhvillim projektesh në inteligjencën artificiale dhe sigurinë kibernetike, përfshirë analiza të avancuara të të dhënave dhe zgjidhje softuerike.
• Trajnime dhe punëtori të përbashkëta, ku ekspertë të Policisë kontribuojnë në mësimdhënie, konferenca dhe programe të specializuara.

Për më shumë informacione mbi partneritetin dhe aktivitetet e Kolegjit AAB, vizitoni faqen zyrtare: https:aab-edu.net