Mr. sc. Ridvan Bunjaku u lind më 3 mars 1979 në Gjilan, ku e përfundoi edhe shkollimin fillor dhe të mesëm. Në vitin 2003 diplomoi në Fakultetin e Shkencave Matematiko-Natyrore të Universitetit të Prishtinës në drejtimin “Matematikë Aplikative”. Ndërsa, në vitin 2014 i përfundoi studimet pasdiplomike në Universitetin e Evropës Juglindore në Maqedoni të Veriut, në drejtimin “Zhvillim i softuerëve dhe aplikacioneve”, ku e fitoi titullin Magjistër i Shkencës Kompjuterike (Mr.Sc).
Përvoja e tij profesionale përfshin punën në industri nga viti 2005 si inxhinier i softuerit, analist i sistemeve, menaxher i projekteve dhe trajner i kurseve zyrtare të Microsoft. Në vitin 2007 u certifikua si Microsoft Certified Solution Developer ndërsa në vitin 2021 si PMI Professional in Business Analysis (PMI-PBA). Aktualisht është analist i sistemeve.
Prof. Bunjaku ka aktivitet të gjatë akademik. Që nga viti akademik 2022, është pjesë e stafit të rregullt në Kolegjin AAB ku i ligjëron lëndët Hyrje në programim dhe Programimi i orientuar në objekte. Në vitin 2018/2019 ka ligjëruar në Kolegjin Riinvest, ndërsa në vitet 2003-2017 ka qenë asistent dhe ligjërues i lëndëve të Shkencës Kompjuterike dhe të Matematikës në Fakultetin e Shkencave Matematike-Natyrore.
Kontributi i tij në shkencë i përfshin dy publikime në revista të indeksuara si SCOPUS dhe Google schoolar.
Ridvan Bunjaku është person me përvojë dhe ndërlidhje në mes akademisë dhe industrisë së zhvillimit softuerik me një numër të madh të përkthimeve shqip të përmbledhjeve të librave në Shkencë Kompjuterike, i njohur për përkushtimin e tij ndaj shkëlqyeshmërisë.
