Msc. Saranda Sherifi Thaçi ka lindur më 15 tetor 1993 në Trestenik, ku përfundoi shkollimin fillor. Shkollimin e mesëm e përfundoi në shkollën e mesme të Mjekësisë “Elena Gjika” në Ferizaj, ndërsa në vitin 2016 i përfundoi studimet dhe diplomoi në kolegjin “Rezonanca” në Prishtinë në drejtimin “Infermieri”. Më pas, në vitin 2019 i përfundoi studimet postdiplomike në institucionin e njëjtë akademik duke fituar titullin “Master i Shkencave të Infermierisë”.
Përvoja e saj profesionale në cilësinë e infermieres ka filluar në QKMF në qytetin e Vitisë nga viti 2019, duke vazhduar ushtrimin e profesionit deri më sot. Po ashtu, që nga viti 2019 është angazhuar si ligjëruese në institucionin akademik Kolegji AAB, në Fakultetin e Shkencave Shëndetësore.
Msc. Saranda Sherifi Thaçi përgjatë angazhimit në kuadër të veprimtarisë profesionale në QKMF ndjek në mënyrë konstante trajnimet përkatëse mbi bazën e së cilave synon të rrisë në vazhdimësi njohuritë profesionale në funksion të rolit të infermierit në zinxhirin e sistemit shëndetësor.
Angazhimi në botën akademike ka sjellë zhvillim dhe cilësi të reja me anë të të cilave synohet që të përforcohen dhe zhvillohen edhe më tej njohuritë në nivele më të larta, duke shpërndarë dijet përkatëse me qëllim të ngritjes së rolit të infermierit në shoqëri dhe avancimit të tij të mëtejshëm.
