Prof. Ass. Dr. Uranela DEMAJ ka lindur më 26 qershor 1989 në Mitrovicë, Kosovë, dhe jetoi në Belgjikë nga viti 1990 deri në vitin 2014. Ajo ka përfunduar ciklin e plotë të studimeve universitare dhe pasuniversitare në Universitetin e Ghent-it në Belgjikë, ku në vitin 2019 u nderua me titullin Doktoreshë e Shkencave në Linguistikë. Disertacioni i saj me titullin: “Çfarë ngjyrë ka flamuri yt kur digjet? Gjuha, identiteti etnik dhe konflikti në peizazhet historike gjuhësore urbane të Prishtinës, Kosovë” (UGent Library Link) paraqet një hulumtim të thelluar në ndërlidhjen mes gjuhës, identitetit dhe çështjeve etnike në kontekstin e pasluftës në Kosovë.
Karriera profesionale e saj filloi menjëherë pas kthimit në Kosovë si ligjëruese në Kolegjin AAB, ku më vonë do të mbajë pozita udhëheqëse të larta si Zëvendësdekane për Çështje Akademike (2018–2021), dhe më pas Zv.Rektore për Shkencë dhe Kërkime (2021–2023). Aktualisht, ajo është profesoreshë e sociolinguistikës në po të njëjtin institucion.
Angazhimi i saj profesional karakterizohet nga një profil ndërdisiplinor dhe nga lidhja aktive mes akademisë dhe institucioneve që merren me të drejtat e njeriut dhe politikat gjuhësore në Kosovë. Ajo ka bashkëpunuar me organizata kombëtare dhe ndërkombëtare si Organizata Ndërkombëtare për Migrim (IOM), Zyra e Komisionerit për Gjuhë pranë Zyrës së Kryeministrit, dhe Komisioneri i Lartë i OKB-së për të Drejtat e Njeriut, ku ka kontribuar në zhvillimin e metodologjive kërkimore dhe politikave që lidhen me të drejtat gjuhësore, diskriminimin, dhe përjashtimin shoqëror.
Fusha e saj e ekspertizës përshin tematika si: sociolinguistika, identiteti gjuhësor dhe etnik, peizazhet gjuhësore, nacionalizmi dhe të drejtat e njeriut. Ajo është autore e shumë punimeve shkencore të botuara në revista prestigjioze si Nationalities Papers, National Identities, Ethnicities, Social Semiotics dhe Springer.
Krahas aktivitetit akademik, Demaj është edhe mentore e studenteve të ciklit të dytë dhe tretë të studimeve, duke kontribuar në rritjen e kapaciteteve kërkimore të gjeneratës së re të studiuesve. Që nga viti 2023, ajo është bashkë- mentore e disertacionit të doktoratës së Aida Thaqit në Universitetin e Antwerp-it në temën e të drejtave të grave dhe gjuhës në Kosovë. Si fituese e bursës prestigjioze Fulbright për vitin akademik 2025-2026, ajo do të angazhohet në qendrën e sociolinguistikës në New York University ku do të vazhdojë punën e saj kërkimore mbi identitetin gjuhësor të diasporës shqiptare në SHBA.
