Në Antalya të Turqisë u zhvilluan turnetë profesionale të tenisit për femra, ITF World Tennis Tour “Antalya Series”. Në këtë ngjarje të rëndësishme, Forta Morina, studente e Fakultetit të Kulturës Fizike dhe Sportit në Kolegjin AAB, shënoi fitore të madhe, duke mundur tenisten ruse Valentina Pozhidaeva me rezultat bindës 6-1, 6-4.

Forta është tenistja e parë nga Kosova që arrin këtë sukses në nivelin ndërkombëtar të tenisit, duke shënuar një moment historik për sportin kosovar.

Gjatë periudhës paraprake, ajo ka zhvilluar përgatitje intensive me lojtarë me përvojë nga e gjithë bota. Trajnimet e saj përfshinë sparing dhe seanca stërvitore me lojtarë të rangut të lartë nga Italia, Ukraina, Çekia, Rusia dhe ekipi i Kosovës në “Davis Cup”.

Përveç kësaj, Forta ka marrë pjesë në disa meçe para-kualifikuese, duke u kualifikuar në katër nga shtatë turne. Këto gara dhe kampet stërvitore janë një përvojë e vlefshme për vazhdimin e karrierës së saj si teniste profesioniste.

Ky sukses tregon përkushtimin dhe punën e palodhshme të Fortës, duke e bërë një shembull frymëzues për të gjithë sportistët e rinj nga Kosova.