Në kuadër të shënimit të Javës Ndërkombëtare të Parasë (Global Money Week), Qendra për Karrierë në Kolegjin AAB ka mbajtur një panel diskutimi me temën “Roli i parasë digjitale në luftimin e evazionit tatimor”, me pjesëmarrjen e përfaqësuesve institucionalë dhe ekspertëve të fushës financiare.
Paneli u moderua nga profesori Medain Hashani, i cili theksoi rëndësinë e trajtimit akademik dhe praktik të zhvillimeve në sektorin financiar, duke vënë në pah rolin në rritje të digjitalizimit në përmirësimin e transparencës dhe forcimin e mekanizmave kundër evazionit tatimor.
Në panel ishin të ftuar Dardan Fusha nga Banka Qendrore e Republikës së Kosovës, Mentor Hyseni nga Administrata Tatimore e Kosovës dhe Bashkim Zeqiri nga Paysera.
z.Fusha nga BQK, trajtoi zhvillimet aktuale në sistemin financiar, me theks të veçantë në rolin dhe ndikimin e teknologjive digjitale në rritjen e efikasitetit të shërbimeve financiare dhe nxitjen e zhvillimit ekonomik. Ai theksoi se avancimi i instrumenteve digjitale të pagesave mundëson procese më të shpejta, më të sigurta dhe me kosto më efektive, duke lehtësuar qarkullimin e mjeteve dhe duke mbështetur aktivitetin ekonomik. Në këtë kontekst ai nënvizoi se këto zhvillime kontribuojnë në rritjen e gjurmueshmërisë së transaksioneve dhe në forcimin e integritetit të sistemit financiar.
Kurse nga perspektiva institucionale tatimore, z.Hyseni nga ATK, vuri theksin në rëndësinë e përdorimit të teknologjisë në identifikimin dhe parandalimin e evazionit tatimor. Ai theksoi se digjitalizimi i proceseve tatimore dhe rritja e bashkëpunimit ndërinstitucional janë elemente kyçe për përmirësimin e përmbushjes së obligimeve tatimore.
Ndërkaq, z.Zeqiri nga Paysera, foli për rolin e platformave financiare digjitale në transformimin e mënyrës së realizimit të pagesave dhe ndikimin e tyre në reduktimin e ekonomisë informale. Ai theksoi se përdorimi i zgjidhjeve moderne të pagesave kontribuon në rritjen e efikasitetit dhe transparencës në aktivitetet ekonomike.
Paneli pati diskutime interaktive dhe shkëmbim të perspektivave ndërmjet panelistëve dhe pjesëmarrëse. Ky aktivitet shërbeu si një hapësirë për trajtimin e çështjeve aktuale që lidhen me zhvillimet ekonomike dhe financiare në nivel vendor dhe global.
