Me qëllim të zhvillimit të bashkëpunimit ndërinstitucional dhe në pajtim me interesat e përbashkëta, Kolegji AAB dhe Komuna e Pejës nënshkruan marrëveshje bashkëpunimi.

Kjo marrëveshje bashkëpunimi përfshin: promovimin e arsimit cilësor nëpërmjet aktiviteteve të përbashkëta, kryerjen e punës praktike për studentët e Kolegjit AAB në institucionet/departamentet, drejtoritë, agjencitë, institucionet shkollore dhe parashkollore të Komunës së Pejës e vizita të ndërsjella të të dy institucioneve.

AAB me këtë marrëveshje, do të ofrojë bursa të plota për nxënësit më të mirë Komunës së Pejës, në cilindo nga programet e studimit, si dhe pika të tjera që janë në interesin e përbashkët ndërinstitucional.

Marrëveshja u nënshkrua nga zv/rektori i Kolegjit AAB, Shemsedin Vehapi dhe kryetari i Pejës, Gazmend Muhaxheri. Zv/rektori Vehapi falënderoi kryetarin Muhaxheri për gatishmërinë e shprehur për bashkëpunim me Kolegjin AAB, duke i thënë se ky institucion do të angazhohet me të gjitha kapacitetet që ka që kjo marrëveshje bashkëpunimi të gjejë implementim sa më të suksesshëm.

Në anën tjetër, kryetari Muhaxheri e falënderoi Kolegjin AAB për krijimin e mundësisë për bashkëpunim dhe se nga kjo marrëveshje, Komuna e Pejës do të shfrytëzojë potencialin akademik si dhe të gjitha mundësitë e tjera që ofron ky institucion të cilat janë në interes të qytetarëve të kësaj komune.

Kolegji AAB si investimi më i madh në Kosovë e më gjerë në sferën e arsimit të lartë jopublik, deri më tani ka nënshkruar marrëveshje bashkëpunimi me disa komuna si dhe shumë institucione e organizata të tjera vendore e ndërkombëtare, ku studentët e këtij kolegji në vazhdimësi kryejnë praktikat profesionale nëpër këto institucione.