Studentët e Gazetarisë të Fakultetit të Komunikimit Masiv në Kolegjin AAB, në kuadër të aktiviteteve të Klubit të Gazetarëve të Rinj, shënuan 21 Tetorin – Ditën Botërore të Televizionit. Me këtë rast, për studentët një prezantim të shkurtër për momentet më historike nëpër të cilat ka kaluar zhvillimi i televizionit si medium e bëri dekani i Fakultetit, Resul Sinani.

Aktiviteti vazhdoi me shfaqjen e dy filmave  për studentët: “Anchorman: The Legend of Ron Burgundy” dhe “Anchorman 2: The Legend Continues” në të cilët paraqitet jeta e moderatorëve të televizionit dhe përgjithësisht prapaskenat e punës në një redaksi lajmesh në televizion, siç është konkurrenca dhe beteja për të qenë i pari në tregun mediatik.

Në përmbyllje të këtij aktiviteti, të nxitur nga prezantimi i ngjarjeve historike të zhvillimit të televizionit dhe nga përmbajtja e filmave, studentët diskutuan momentet që u kanë bërë përshtypje, pasi që filmat edhe pse janë komedi, ato kanë brenda vetes shumë simbolika, ndër të cilat edhe sfidat e grave për të depërtuar në botën e ekranit dhe pengesat që u bëhen atyre nga burrat. Po ashtu, nga diskutimi me studentët u konkludua se produkti televiziv, në kohën e internetit dhe zhvillimeve teknologjike të kohës, përmes shfrytëzimit të kanaleve të reja po arrin edhe nëpër ato grupe shoqërore në të cilat nuk ka mundur të arrinte përmes televizorit.