Profesoresha e Fakultetit të Gjuhës Angleze të Kolegjit AAB Eriona Ajvazi ka marrë pjesë në trajnimin për kërkim shkencor në Radboud University të Holandës, si pjesë e shkëmbimit të stafit akademik në kuadër të programit Erasmus+.

Trajnimin e udhëhoqi profesoresha amerikane Erin Jenne nga Central European University, e cila ka bërë hulumtime në vende të ndryshme të botës përfshirë edhe Kosovën, për të botuar më pas libra dhe artikuj të shumtë shkencorë.

Hulumtues nga vende të ndryshme ishin pjesë e këtij organizimi duke ndarë përvojat e tyre dhe në të njëjtën kohë për t’u njohur me metodat e reja teorike dhe praktike rreth fushës akademike.

Ky shkëmbim është financuar nga programi Erasmus+, falë bashkëpunimit që ka Kolegji AAB me Radboud University.