Dizajn i Modës

Qëllimi dhe profili i programit

Programi Bachelor në Dizajn Mode është një program trevjeçar në fushën e arteve që synon përgatitjen e studentëve me njohuri të thelluara mbi parimet e dizajnit, lidhjen ndërmjet modës dhe artit, si dhe zhvillimin historik të veshjes në kuadër të ndryshimeve sociale, ekonomike dhe industriale. Procesi mësimor bazohet në hulumtim dhe eksplorim krijues, duke i angazhuar studentët në analiza të elementeve vizuale që ndikojnë në krijimtarinë artistike të shprehur përmes veshjes.

Një komponent i rëndësishëm i programit është aftësimi praktik në dizajn tekstili, manipulim të materialeve dhe në ndjekjen e trendëve bashkëkohore që përcaktojnë industrinë globale të modës.

Përveç aftësive klasike të realizimit të skicave, studentëve u ofrohen mundësi për prezantimin e punimeve të tyre në format dixhital, përmes përdorimit të programeve profesionale të dizajnit, çka kontribuon në zhvillimin e një portofoli përfundimtar me standarde bashkëkohore.

Misioni

Misioni i programit të studimit BA në Dizajn Mode është të sigurojë mësimdhënie, hulumtim dhe praktikë me cilësi të lartë me metodat dhe tendencat më të fundit bashkëkohore që promovojnë të menduarit kritik si dhe debate të vazhdueshme që u shërbejnë studentëve për të dialoguar dhe artikuluar në mënyrë profesionale dhe që u mundëson studentëve qasje në tregun e industrisë së modës.

Bartësit e programit tё studimit

• Laura Ukshini
• Zana Haruni
• Riona Sylejmani
• Teuta Osmani
• Diellza Salihu

Rezultatet e pritshme

Pas përfundimit me sukses të programit BA Dizajn i Modës, studentët pritet të demonstrojnë këto njohuri, shkathtësi dhe kompetenca:

Njohuri

• demonstrojnë njohuri teorike dhe praktike me kapacitete të zgjeruara, duke respektuar normat e pranuara të praktikës krijuese në dizajnin e modës;
• kuptojnë zhvillimet historike, kulturore dhe bashkëkohore të modës dhe ndikimet e tyre në industrinë e dizajnit;
• njohin teoritë, filozofitë dhe qasjet bashkëkohore të dizajnit të modës;
• njohin materialet, tekstilet, teknikat e modelimit dhe proceset e prodhimit të veshjeve;
• kuptojnë metodologjitë e hulumtimit dhe analizës vizuale në fushën e modës;

Shkathtësi

• krijojnë punë të dizajnit të modës që përmbushin standardet profesionale dhe kërkesat e tregut;
• përdorin mjete analitike dhe kreative për zhvillimin e ideve dhe koncepteve të reja të dizajnit;
• zbatojnë aftësitë teknike në modelim, patronazh, vizatim digjital dhe përgatitje të portfolios;
• aplikojnë teknologjitë bashkëkohore për prezantim dhe zhvillim të projekteve të modës;
• hulumtojnë, analizojë dhe sintetizojë informacione për të mbështetur punën krijuese dhe teorike;
• artikulojnë qartë idetë përmes formave vizuale, verbale dhe të shkruara profesionale;

Kompetenca

• menaxhojnë procesin krijues dhe projektet e dizajnit të modës nga koncepti deri te realizimi;
• punojë në mënyrë të pavarur dhe në grup, duke respektuar etikën profesionale dhe bashkëpunimin ndërdisiplinor;
• artikulojnë filozofinë personale të dizajnit dhe ndërtojnë qëndrime kritike ndaj praktikave bashkëkohore të modës;
• përdorin dizajnin si mjet për analizë, debat dhe inovacion në kontekstin kulturor e tregtar;
• integrojë mendimin kritik, aftësitë kërkimore dhe përgjegjësinë profesionale në praktikën e përditshme;
• vazhdojnë studimet e avancuara ose integrohen në tregun ndërkombëtar të modës.
  

Pranimi nё studime

Sipas nenit 6 të Rregullores, studimet në programin BA Dizajn i Modës kanë të drejtë t’i regjistrojnë të gjithë ata kandidatë të cilët i kanë përfunduar shkollimin e mesëm, posedojnë dokumentacionin e nevojshëm si dhe përmbushin kriteret minimale të pranimit të përcaktuara nga Senati. Sipas nenit 5 të Rregullores për Studime Bachelor, kushtet për pranim në studimet Bachelor janë:

• përfundimi me sukses i shkollës fillore dhe të mesme me së paku 12 vite të shkollimit i vërtetuar me diplomë përkatëse;
• përfundimi me sukses i Testit të Maturës Kombëtare sipas kritereve të përcaktuara nga Ministria e Arsimit, Shkencës dhe Teknologjisë i cili vërtetohet me dëshmi përkatëse;
• kompletimi me sukses i procedurës përzgjedhëse;
• kompletimi i dosjes me dokumentacionin formal ashtu siç përcaktohet nga MASHT.

Numri i vendeve për studim

Numri i vendeve për studim sipas vendimit të AKA-së është 120 studentë për vit akademik.

Njohja e kualifikimeve

Në bazë të Rregullores për Studime Bachelor të Kolegjit AAB, njohja e kualifikimeve dhe transferi i studimeve rregullohen nga Nenet 6, 7 dhe 8 të kësaj rregulloreje.

Këto nene përcaktojnë kushtet, kriteret dhe procedurat për pranimin e studentëve nga institucione të tjera të arsimit të lartë, mënyrën e realizimit të transferimit, si dhe procesin e njohjes dhe barazvlerësimit të lëndëve të studiuara më parë.

Kohëzgjatja dhe numri i ECTS-ve

Studimet në programin BA Dizajn i Modës zgjasin 3 vite, 180 ECTS me gjithsej 6 semestra.

Niveli dhe grada akademike

Me rastin e përfundimit të studimeve, studentët fitojnë thirrjen akademike Bachelor i Arteve në Dizajn tё Modёs.

Perspektivat e punësimit tё studentëve

Të diplomuarit nga programi BA Dizajn i Modës zotërojnë kompetenca të gjera kreative dhe teknike, që u mundësojnë të angazhohen në role të ndryshme profesionale brenda industrisë së modës dhe sektorëve të lidhur me të. Ata janë të përgatitur për pozita si stilistë mode, modelues tekstili, dizajnerë aksesorësh, kostumografë për teatër, film dhe media, fashion illustrators, si dhe drejtues kreativë në projekte të ndryshme artistike dhe komerciale.

Metodat e vlerësimit

Metodat e vlerësimit përfshijnë detyra praktike në dizajn, projekte kreative individuale dhe në grup, prezantime vizuale dhe portofolin personal, i cili reflekton progresin artistik gjatë studimeve. Gjithashtu, përdoren ese teorike, analiza të rasteve studimore dhe teste njohurish në lëndët historike dhe teorike të modës.

Kohëzgjatja dhe vëllimi

Tё dhënat pёr kalueshmërinë, braktisjen e studimeve dhe punësimin

BRAKTISJA E STUDIMEVE <5%

PUNËSUESHMËRIA E STUDENTËVE >60%

SUKSESI I STUDENTËVE NË PROVIME 8.5

Tё drejtat e studentëve

Studentët e Kolegjit AAB, bazuar në Statutin dhe Rregulloren e Studimeve BA, gëzojnë të drejtën të marrin pjesë në ligjërata dhe aktivitete akademike, të përdorin shërbimet universitare si biblioteka dhe interneti, të përfaqësohen në organet e studentëve, të organizohen në shoqata jo-politike, të pajisen me dokumente zyrtare studentore dhe, pas përfundimit të studimeve, të marrin diplomën përkatëse. Studentët kanë të drejtë të paraqesin ankesa dhe kërkesa lidhur me çdo aspekt të procesit mësimor, vlerësimit apo çdo çështje tjetër që konsiderojnë se u pengon zhvillimin e tyre akademik dhe mirëqenien gjatë studimeve në kolegj.

Pjesëmarrja e studentëve nё proceset e sigurimit tё cilësisë

Në Kolegjin AAB, studenti është akter i barabartë i cili përfshihet në hartimin, zbatimin dhe vlerësimin e proceseve të sigurimit të cilësisë. Studentët janë pjesëmarrës aktiv në çdo grup punues apo punëtori në të cilën diskutohet politik bërja, planifikimi strategjik dhe vendimmarrja. Në veçanti, studenti merr pjesë në procedurat e sigurimit të cilësisë përmes:

• vlerësimit të stafit akademik dhe përmbajtjeve mësimore;
• vlerësimit të shërbimeve administrative dhe infrastrukturës;
• anëtarësisë së plotë në trupat akademike dhe vendimmarrëse të institucionit;
• pjesëmarrjes në komisione dhe grupe punuese;
• përfshirjes në procesin e hartimit, plotësimit dhe rishikimit të programeve të studimit;
• dhënies së inputeve të vazhdueshme për çdo fushë e cila i përket studentit dhe kolegjit;
• dhënies së rekomandimeve për përmirësim për secilën procedurë, politikë, proces apo vendim i cili lidhet me kolegjin.