Prof. Ass. Dr. Ramë Buja ka lindur më 5 korrik 1958 në fshatin Bujan të komunës së Lipjanit. Ai është një ndër figurat më të njohura të jetës akademike, politike dhe intelektuale në Kosovë, me një karrierë të shtrirë në disa dekada që përfshin angazhime të rëndësishme në arsimin e lartë, qeverisje, diplomaci dhe studim shkencor.
Studimet e tij i ka ndjekur dhe përfunduar në Universitetin e Prishtinës, duke diplomuar fillimisht në Fakultetin e Filozofisë në drejtimin Gjuhë dhe Letërsi Shqipe, për të vazhduar më tej me studime në Fakultetin Ekonomik dhe Fakultetin Juridik. Në vitin 2004 ai mori titullin Magjistër i Shkencave Juridike në fushën e Lidershipit Politik dhe Administrativ, ndërsa në vitin 2006 u nderua me titullin Doktor i Shkencave Politike.
Karriera e tij akademike ka qenë po aq e pasur sa edhe ajo politike. Ai ka ligjëruar në shumë institucione të arsimit të lartë, përfshirë Universitetin e Prishtinës, Universitetin e Evropës Juglindore në Tetovë, Universitetin “Victory”, Kolegjin “Fama”, dhe që nga viti 2006 është pjesë e pandërprerë e stafit akademik në Kolegjin AAB. Në AAB, ai ka dhënë lëndë të tilla si Sisteme Politike, Mendimi Politik dhe Juridik, Fillet e së Drejtës, Histori e diplomacis, Hyrje në Shkenca Politike, etj. Prof. Buja është njohur për përkushtimin dhe ndikimin e tij të vazhdueshëm në formimin e studentëve në shkencat politike dhe juridike.
Në planin institucional, Ramë Buja ka mbajtur pozita të rëndësishme në jetën politike të vendit. Ai ka qenë Ministër i Arsimit, Shkencës dhe Teknologjisë nga viti 2011 deri në vitin 2014, ku ka udhëhequr me përkushtim një ndër dikasteret më jetike për zhvillimin e vendit. Në periudhën 2004–2010 ka qenë anëtar i Kuvendit të Republikës së Kosovës, ku për disa vite me radhë ka drejtuar Grupin Parlamentar të Partisë Demokratike të Kosovës. Roli i tij në qeverinë e përkohshme si Ministër i Pushtetit Lokal në vitet 1999–2000 ishte i një rëndësie të veçantë në fazën e ndërtimit të institucioneve të pasluftës. Ai gjithashtu ishte anëtar i delegacionit të Kosovës në Konferencën e Rambujesë në vitin 1999 dhe ka qenë pjesëtar i Shtabit të Përgjithshëm të UÇK-së gjatë periudhës vendimtare për çlirimin e vendit.
Përveç kontributit të tij në arsim dhe politikë, Prof. Buja ka dhënë një ndihmesë të veçantë edhe në fushën e studimeve dhe publikimeve shkencore. Ai është autor dhe bashkautor i disa librave të rëndësishëm, si:
Këto vepra ofrojnë një pasqyrë të thellë të zhvillimeve politike dhe shtetformuese të Kosovës nga perspektiva akademike dhe përvojë praktike.
Veprimtaria e tij shkencore është përfaqësuar edhe në konferenca të ndryshme ndërkombëtare, përfshirë prezantimet e tij në Kolegjin AAB për zgjedhjet parlamentare të vitit 2021, si dhe në Universitetin e Evropës Juglindore në Shkup për temën “Kultura Politike dhe Pjesëmarrja Qytetare”. Kontributet e tij si studiues përfshijnë gjithashtu një numër të konsiderueshëm artikujsh dhe eseve, të botuara në gazetat dhe revistat më të njohura të vendit, duke reflektuar mbi sfidat e tranzicionit, identitetin politik dhe zhvillimet historike të Kosovës.
Për kontributin e tij shumëvjeçare në arsim dhe shoqëri, Prof. Ramë Buja është nderuar në vitin 2024 me titullin “Profesor Nderi” nga Kolegji AAB, si një vlerësim simbolik për ndikimin e tij të vazhdueshëm në ngritjen e cilësisë akademike dhe intelektuale në Kosovë.
Ai është gjithashtu anëtar i rrjetit profesional NISPAcee – një ndër rrjetet më prestigjioze të institucioneve dhe shkollave të administratës publike në Evropën Qendrore dhe Lindore, që nga viti 2003.
Është i njohur për qasjen multidisiplinare, kreativitetin në ligjërim dhe përkushtimin në rritjen e cilësisë akademike.
Prof. Ramë Buja është prind i tre fëmijëve, gjysh i një nipi dhe tre mbesave. Ai jeton dhe punon në Prishtinë.
