Tre profesorë nga Šiauliai State College të Lituanisë kanë ardhur në Kolegjin AAB si rezultat i projektit Erasmus+, për shkëmbimin e stafit akademik. Ata u shoqëruan nga prorektorja e Kolegjit AAB, Venera Llunji, e cila u tregoi për rezultatet dhe sukseset e shënuara ndër vite të institucionit, bashkë me dekanin e Fakultetit të Shkencave Kompjuterike, Jusuf Qarkaxhija dhe profesorin e këtij fakulteti Samir Jakupi.

Profesorët Saulius Niauronis, Marius Kernagis dhe Donatas Dervinis do të qëndrojnë gjatë tërë javës në Kolegjin AAB, ku do jenë pjesë e stafit të Fakultetit të Shkencave Kompjuterike.

Qëllimi i vizitës një javore është që të shkëmbejnë përvojat, sfidat dhe çështjet e ndryshme akademike dhe profesionale në fushën e inxhinierisë, programimit dhe sigurisë kibernetike. Ndërsa gjatë javës do zhvillohen takime edhe me Zyrën e Projekteve të Kolegjit AAB, për të parë propozime të projekteve, ku të dy institucionet do jenë bashkë si partnerë potencial.