Përfaqësues të Kolegjit AAB sot kanë pritur në një takim Presidentin e Kolegjit të Shkencave Mjekësore, Mercy College of Health Sciences nga Iowa e ShBA, Dr. Doughlas Fiore, së bashku me znj. Edlira Dibrani, Zyrtare nga Oda Amerikane në Kosovë.

Qëllimi i kësaj vizite ishte njohja me profilin e Kolegjit AAB, me aktivitetetet akademike, infrastrukturën, si dhe specifikisht me programet e studimit të fushës së mjekësisë në Kolegjin AAB.

Dr. Fiore u njoftua për së afërmi me suksesin e programit të Infermierisë në Kolegjin AAB, me stafin akademik si dhe me laboratoret e avancuara në këtë fushë.

Pas prezantimit të të arriturave të Kolegjit AAB nga Dekani i Fakultetit të Infermierisë, Dr. Idriz Sopjani, Dr. Fiore shprehu gatishmërinë e tij dhe të institucionit që përfaqëson për mbështetje të Kolegjit AAB, studentëve dhe stafit akademik, në zhvillimin e tyre të mëtejmë në fushën e shkencave mjekësore.

Me qëllim të konkretizimit të aktiviteteve të përbashkëta, Dr. Sopjani dhe Dr. Fiore u dakorduan që të dy institucionet të punojnë në drejtim të hartimit të një marrëveshje të bashkëpunimit e cila kryesisht do të parashohë shkëmbimin e stafit akademik dhe profesional mes dy institucioneve, shkëmbimin e studentëve dhe më me rëndësi ofrimin e bursave për mobilitet për studentët e Kolegjit AAB në Mercy College of Health Sciences në Iowa.

Mercy College of Health Sciences në Iowa, SHBA është institucion i arsimit të lartë në SHBA, i profilizuar në ofrimin e programeve të studimit në fushën e shkencave mjekësore.