Në një ceremoni solemne në ambientet e Kolegjit AAB, në Prishtinë, u hap ekspozita e studentëve të Fakultetit të Arteve dhe Arkitekturës të AAB-së,  në bashkëpunim me  Caritas Kosova. Në këtë ekspozitë, e të cilën e shpallën të hapur dekani, Shyqeri Nimani dhe drejtori i  Caritas Kosovës,  Dom Viktor Sopi,  janë  ekspozuar  mbi 30  punime në disiplinat e  pikturës dhe të posterit.

Dekani Shyqyri Nimani deklaroi se vlerat e kësaj ekspozite janë të jashtëzakonshme. “Në këtë rast tema ka qenë shumë aktuale,  që ka të bëjë me trafikimin  e  qenies njerëzore,  dhe  studentët  këtë  temë e kanë marrë me kohë dhe  i kanë shfaqë idetë e tyre në disiplina të caktuara. Unë mendoj se këto punime tashmë janë vepra të përsosura”, ka vlerësuar Nimani. Ndërsa drejtori i Caritasit, Dom Viktor Sopi, falënderoi Kolegjin AAB për një bashkëpunim të tillë, dhe tha se trafikimi i qenieve njerëzore është një problem global, prandaj edhe ne si një vend i vogël duhet të punojmë në këtë drejtim  që ta mbrojmë dinjitetin tonë njerëzor.

Po ashtu, gjatë kësaj ekspozite u dhanë edhe tre shpërblime për tre punimet më të mira, me motiv të luftës kundër trafikimit me qeniet njerëzore. Vendi i parë i takoi Altin Krasniqit, vendi i dytë Gëzim Halitit, dhe i treti Taulant Mehmeti.

I gjithë aktiviteti u mbështet nga  Caritas Kosova, në kuadër të fushatës kundër  trafikimit të qenies njerëzore.